Ázerbaıjan men Armenııa Danııadaǵy kezdesýden keıin dıalogty jalǵastyrýǵa kelisti

ASTANA.KAZINFORM - Kopengagendegi Eýropalyq saıası qoǵamdastyqtyń 7-shi sammıtiniń ashylý saltanaty aıasyndaǵy kelissózder konstrýktıvti atmosferada ótip, eki el arasyndaǵy turaqty beıbitshilik úshin mańyzdy qadam boldy, dep habarlaıdy Kazinform agenttiginiń menshikti tilshisi.

Ázerbaıjan prezıdenti Ilham Álıev pen Armenııa premer-mınıstri Nıkol Pashınıan AQSh prezıdenti Donald Tramptyń bastamasymen uıymdastyrylǵan Vashıngton beıbitshilik sammıtinde qol jetkizilgen kelisimderdiń júzege asyrylýyn talqylady. Eki jaq ta budan ári dıalogqa daıyn ekendikterin qýattap, Vashıngton deklaratsııasynda bekitilgen qaǵıdattardy ustanatyndyqtaryn bildirdi.

Kólik kommýnıkatsııalary men ınfraqurylymyn damytýǵa erekshe kóńil bólindi. Taraptar Ázerbaıjandaǵy logıstıkalyq habtar men avtojoldar qurylysynyń barysyn, sondaı-aq Armenııada júzege asyrylyp jatqan TRIPP jobasyn egjeı-tegjeıli talqylady. Kóshbasshylar zamanaýı kólik baǵyttarynyń iske qosylýy ekonomıkanyń ósýine, aımaqtyq turaqtylyqty nyǵaıtýǵa jáne shekaranyń eki jaǵyndaǵy ómir súrý deńgeıin jaqsartýǵa yqpal etetinine senim bildirdi.

Kezdesýdiń mańyzdy nátıjesi EQYU-nyń Mınsk protsesin jabý jáne onymen baılanysty qurylymdardy taratý týraly sheshimdi biraýyzdan maquldaý boldy.

Kezdesý sońynda kóshbasshylar tikeleı baılanysty saqtap, jaqyn arada kelissózderdiń jańa raýndyn uıymdastyrýǵa kelisti.

Esterińizge sala keteıik, 8 tamyzda Ázerbaıjan prezıdenti, Armenııa premer-mınıstri jáne AQSh prezıdenti Vashıngtonda Baký men Erevan arasyndaǵy qarym-qatynasty beıbit jolmen retteý týraly birlesken deklaratsııaǵa qol qoıǵan bolatyn.

Buǵan deıin Ázerbaıjan Armenııamen beıbitshilik ornatýdyń negizgi sharttaryn atady.

Armenııa premer-mınıstri beıbit kelisimdi qamtamasyz etý úshin Konstıtýtsııaǵa ózgerister engizýge daıyn ekenin málimdedi.

Buǵan deıin Baký men Erevan arasyndaǵy ýaǵdalastyq Qazaqstanǵa qalaı áser etetini týraly sarapshylar pikirin jarııalaǵan edik.