Ázerbaıjan men Armenııa azamattyq qoǵam ókilderiniń jańa kezdesýine daıyndalyp jatyr

ASTANA. KAZINFORM — «Beıbitshilik kópiri» bastamasy aıasynda Ázerbaıjan men Armenııa azamattyq qoǵam ókilderiniń kelesi kezdesýi 2026 jyldyń sońyna deıin ótedi, dep habarlaıdy Kazinform agenttiginiń Bakýdegi tilshisi Trend agenttigine silteme jasap.

Ázerbaıjan men Armenııa azamattyq qoǵam ókilderiniń jańa kezdesýine daıyndalyp jatyr
Foto: Eýropa Keńesi

Halyqaralyq qatynastar men mýltımádenıettilikti taldaý ortalyǵy tóraǵasynyń orynbasary Farhad Mammadov Ázerbaıjan tarapynyń úılestirýshisi qyzmetin atqaratyny habarlandy.

Onyń aıtýynsha, kezdesýdi Armenııa aýmaǵynda ótkizý josparlanǵan. Aldaǵy is-sharanyń egjeı-tegjeıleri áli jarııalanǵan joq.

«Beıbitshilik kópiri» — eki eldiń azamattyq qoǵam ókilderi arasyndaǵy tikeleı dıalog alańy. Bastama ózara senimdi nyǵaıtýǵa jáne qoǵamdyq deńgeıde baılanystardy saqtaýǵa baǵyttalǵan. Kezdesýler barysynda qatysýshylar beıbitshilik protsesin, aımaqtyq qaýipsizdikti, aqparat almasýdy jáne azamattyq qoǵamnyń qarym-qatynastardy qalpyna keltirýge qosqan úlesin talqylaıdy. Bastama aıasyndaǵy alǵashqy kezdesý 2025 jyldyń 21-22 qazanynda Erevanda, al kelesi kezdesý sol jyldyń 21-22 qarashasynda Bakýde ótti. Sońǵy kezeń 2026 jyldyń 10-12 sáýirinde Ázerbaıjannyń Gabala qalasynda boldy. Osy baılanystar barysynda tikeleı dıalogty damytý, senimdi nyǵaıtý jáne qoǵam ókilderiniń beıbitshilik kún tártibin ilgeriletýge qatysýy talqylandy.

Aldaǵy kezdesý eki el ókilderi arasyndaǵy beıbitshilik protsesi aıasynda ótip jatqan baılanystardy jalǵastyrady.

Ótken aptada Dýblınde Ázerbaıjan men Armenııa kóshbasshylary beıbitshilikti nyǵaıtý, kólik baılanystaryn damytý jáne ekonomıkalyq yntymaqtastyqty keńeıtý boıynsha odan ári qadamdardy talqylady.

Buǵan deıin Armenııa beıbit kelisimge qol qoıylǵannan keıin Ázerbaıjanǵa qarsy talap-aryzdaryn qaıtaryp alatyny habarlanǵan.

AQSh, Ázerbaıjan jáne Armenııa TRIPP jobasy boıynsha tehnıkalyq toptar qurdy.