Ázerbaıjan men Armenııa Almatyda kelissóz ótkizedi – SІM

ASTANA: KAZINFORM – Qazaqstan Ázerbaıjan men Armenııaǵa kelissózder alańyn usynady. Bul týraly QR Syrtqy ister mınıstrliginiń resmı ókili Aıbek Smadııarov aptalyq brıfıngte málim etti.

Prezıdent Qasym-Jomart Toqaev Bakýǵa da, Erevanǵa da jaqynda jasaǵan saparlarynda osy elder arasynda berik, uzaqmerzimdi beıbitshilikti tez arada ornatýdyń mańyzyn atap ótken edi. 

Sondaı-aq, Qazaqstannyń kelissóz ótkizý úshin alań usyný arqyly járdem kórsetýge daıyn ekenin málimdedi.

«Shynynda da, osyndaı kelissózder Almatyda ótýge josparlanyp otyr. Biz Ázerbaıjan men Armenııadaǵy áriptesterimizben baılanystamyz. Aldaǵy kelissózder tek qana eki tarap arasynda júrgiziledi. Astananyń deldaldyǵy týraly sóz joq ekenin atap ótkim keledi. Biz tek qana «Good office» dep atalatyn izgi nıet qyzmetterin kórsetemiz. Ótetin kúni nemese basqa da aqparat qosymsha habarlanady», - dedi A. Smadııarov.

Sonymen birge, A. Smadııarov bul kelissózge jumsalatyn qarajat týraly tilshiler suraǵyna jaýap berdi.

«Bul sondaı aýqymdy shara emes. Qazaqstan qandaı da bir shyǵyndardy óteýi múmkin, biraq qos tarap mámilege kelip jatsa, onyń paıdasy tutas aımaqqa septigin tıgizedi», - dep jaýap berdi resmı ókil.