Ázerbaıjan memlekettik basqarý júıesine jasandy ıntellektini engizýdi qarastyryp jatyr

BAKÝ. Trend-QazAqparat – Ázerbaıjanda memlekettik basqarý júıesine jasandy ıntellekt engizý máselesine nazar aýdarylyp otyr, Bul týraly Ázerbaıjannyń Innovatsııalar esporty jónindegi konsortsıýmynyń atqarýshy dırektory Farıd Kıazımov málim etti, dep habarlaıdy QazAqparat Trend agenttigine silteme jasap.

Onyń aıtýynsha, jasandy ıntellekt sońǵy jyldary joǵary tehnologııalar salasynyń basty taqyrybyna aınalǵan.

«Buǵan sátti jáne sátsiz jasalǵan kóptegen mysal bar. Biraq jasandy ıntellekt kóbine qateliktiń quny qymbat bolmaıtyn bızneste belsendi qoldanylady», - dedi Kıazımov.

Ol el úkimetiniń jasandy ıntellekt taqyrybyn saqtyqpen qolǵa alǵanyn atap ótti.

«Elimizde osyndaı tehnologııalarǵa kóńil bólinip otyr. Sáýir aıynda Ázerbaıjanda memlekettik basqarý júıesine jasandy ıntellekt engizý taqyrybyndaǵy onlaın konferentsııa ótken. Mundaı ınnovatsııalar Ázerbaıjanda qoldanylady, bul protsesti toqtatý múmkin emes», - dedi atqarýshy dırektor.

Onyń aıtýynsha, eger jasandy ıntellekti qoldaný paıdaly baǵyttar týraly sóz qozǵalsa, bul tizimde birinshi kezekte bilim berý, medıtsına, qarjy, kólik, bıznes ákimshelendirýdiń jekelegen segmentterin (HR, zańdy qyzmet kórsetý, býhgalterııa), saýdany ataý kerek.

«Búginniń ózinde árbir qoldanýshy jasandy ıntellektige kún saıyn tap bolady, sebebi kóptegen álemdik onlaın qyzmetter osy tehnologııany belsendi engizdi. Biraq naǵyz alǵa ilgerileýdi 2028-2030 jyldarǵa qaraı kútýge bolady dep oılaımyn. Boljamǵa sáıkes, bul kezde jasandy ıntellekt adam mıynyń fýnktsıonalyna jaqyndaýy ábden múmkin», - dedi Kıazımov.