Ázerbaıjan mektepterinde sabaq kezinde telefon paıdalanýǵa tyıym salyndy
ASTANA. KAZINFORM – Ázerbaıjannyń Ǵylym jáne bilim mınıstrligi eldegi mektepke deıingi toptar men jalpy bilim berý mekemelerinde mobıldi jáne elektrondyq qurylǵylardy paıdalanýdyń jańa erejelerin bekitti, dep habarlaıdy Kazinform agenttiginiń Bakýdegi menshikti tilshisi.
Tıisti sheshimge Ázerbaıjannyń Ǵylym jáne bilim mınıstri Emın Amrýllaev qol qoıdy.
Bekitilgen erejelerge sáıkes, mobıldi jáne elektrondyq qurylǵylarǵa uıaly telefondar, planshetter, smart saǵattar, noýtbýktar, portatıvti oıyn konsolderi jáne daýystyq jáne beıne baılanys, ınternetke qol jetkizý, aqparatty saqtaý jáne berý, sondaı-aq mýltımedııada paıdalanýǵa arnalǵan jáne basqa da uqsas qurylǵylar jatady.
Qujatta oqýshylarǵa sabaq kezinde mobıldi jáne elektrondyq qurylǵylardy paıdalanýǵa tyıym salý qarastyrylǵan.
Oqýshylar bilim berý mekemesine ákelgen qurylǵylar sabaqtar aıaqtalǵansha mektep ákimshiligi belgilegen arnaıy oryndarda óshirilgen nemese dybyssyz rejımde saqtalýy tıis. Bul maqsatta arnaıy bokstar, shkaftar jáne basqa da arnaıy saqtaý oryndary paıdalanylýy múmkin.
Oqý protsesinde mobıldi qurylǵylardy paıdalanýǵa tek oqytýshynyń ruqsatymen jáne tek bilim berý maqsattarynda – elektrondyq oqý materıaldaryna qol jetkizý, mamandandyrylǵan qosymshalardy paıdalaný, prezentatsııalar daıyndaý jáne zertteý jumysyn júrgizý úshin ruqsat etiledi.
Budan basqa, bilim berý mekemesiniń aýmaǵynda aqparat almasý úshin mobıldi jáne elektrondyq qurylǵylardy paıdalanýǵa tek tótenshe jaǵdaılar, densaýlyq máseleleri jáne basqa da shuǵyl jaǵdaılardy qosa alǵanda qajettilik týyndaǵan jaǵdaıda ǵana ruqsat etiledi.
Qujatta tsıfrlyq qaýipsizdik máselelerine erekshe nazar aýdaryldy. Bilim berý mekemeleriniń ákimshiligine oqýshylar, muǵalimder jáne ata-analar úshin tsıfrlyq tehnologııalar, aqparattyq qaýipsizdik, elektrondy oıyndardy qaýipsiz paıdalaný jáne kıberqaýipsizdik máseleleri boıynsha bilim berý is-sharalaryn únemi uıymdastyrý tapsyrylǵan.
Budan buryn Ázerbaıjanda zańsyz qumar oıyn bıznesine jaýapkershilikti kúsheıtý josparlanyp otyrǵanyn jazǵan bolatynbyz.
