Ázerbaıjan Qorǵanys mınıstri «Tank bıatlony» baıqaýyndaǵy qazaqstandyqtardyń nátıjelerin joǵary atap ótti
General-polkovnık Zákir Ǵasanov qazaqstandyq tankishilerge ataýly saǵattar tabys etti, dep jazady QR Qorǵanys mınıstrliginiń baspasóz qyzmeti.
Qazaqstan Qarýly Kúshteriniń áskerı qyzmetshileri Armııa halyqaralyq oıyndarynyń «Tank bıatlony» baıqaýynda 17 qatysýshy komanda arasynda úshinshi bolyp, osy saıystyń qola júldesin jeńip aldy. «Tank bıatlony» baıqaýynyń fınalynda Máskeý qalasynyń mańyndaǵy «Alabıno» polıgonynda Reseı, Belorýssııa, Qazaqstan jáne Qytaıdyń ekıpajdary óner kórsetti. Barlyq komandalar reseı tarapymen usynylǵan T-72B3 tankterinde óner kórsetti. Qytaı komandasy saıystarǵa jeke menshik óndirisiniń tankisinde, al Belorýssııanyń áskerı qyzmetshileri respýblıkanyń kásiporyndarynda jańartýdan ótken T-72 tankisinde qatysty. Azııa, Eýropa, Afrıka jáne Latyn Amerıkanyń 19 memleketinen 120 armııa komandasy arasynda áskerı qyzmetshilerimiz ekinshi jalpy komandalyq oryndy enshilegenin aıta keteıik.
Bıylǵy jyly Armııa halyqaralyq oıyndary erekshe mazmundylyǵy jáne aýqymdylyǵymen erekshelendi. Halyqaralyq yntymaqtastyqtyń, tájirıbe almasýdyń, beıbitshilik pen nıettestik kepiliniń jańa sımvolyna aınaldy.
600-den asa áskerı qyzmetshimiz Reseıdiń túkpir-túkpirinde ornalasqan 19 áskerı polıgonda qurlyqta, teńizde jáne kók aspanda Qazaqstan Qarýly Kúshterimizdiń namysyn qorǵady. 
