Ázerbaıjan Qazaqstannyń EKSPO kórmesin ótkizý tájirıbesine qyzyǵady - ÁR Prezıdentiniń kómekshisi
«Astana halyqaralyq deńgeıdegi aýqymdy sharalar ótip jatatyn iri qalaǵa aınalyp keledi. Sol sharalardyń biri retinde - «EKSPO-2017» Halyqaralyq mamandandyrylǵan kórmesin atap ótýge bolady. Ózderińiz biletindeı, Ázerbaıjan tarapy 2025 jyly osyndaı EKSPO kórmesin ótkizýge usynys bildirdi. Osyǵan oraı, biz sharany joǵary dárejede ótkizgen Qazaqstan tarapynyń tájirıbesine qyzyǵyp otyrmyz. Sonymen birge, EKSPO kórmesin ótkizetin qalany tańdaýda qoldaý bildirgen Qazaqstan Úkimetine alǵys bildiremiz», - dedi Álı Gasanov.
Onyń aıtýynsha, Qazaqstan úshin mańyzdy qadamdardyń biri - latyn qarpindegi qazaq álipbıine kóshý máselesi.
«Birinshiden, bul qadam qazaqtardyń birligin nyǵaıta túsedi, ekinshiden ózge túrki halyqtarymen Qazaqstannyń yntymaǵy nyǵaıa túsedi. Qazaqstannyń barlyq jetistikterin - Prezıdentterińiz Nursultan Nazarbaevtyń sarabdal saıasatynyń jemisi dep aıtýǵa bolady. Sózsiz Nursultan Ábishuly - eń aldymen óz halqynyń uly, sonymen birge álemdik dárejedegi tulǵa», - deıdi Álı Gasanov.
Eske sala ketsek, Astanadaǵy Elbasy kitaphanasynda búgin ázerbaıjan tilindegi «Nursultan Nazarbaev. Ómirbaıan» kitabynyń tusaýkeseri bolyp ótken bolatyn. Kitaptyń tusaýyn kitaptyń avtory QR Prezıdenti Keńsesiniń bastyǵy, Tuńǵysh Prezıdent - Elbasy kitaphanasynyń dırektorynyń mindetin atqarýshy, professor Mahmud Qasymbekov pen Ázerbaıjan Respýblıkasy Prezıdentiniń qoǵamdyq-saıası máseleleri jónindegi kómekshisi Álı Gasanov kesti. Týyndy 2012 jyly jaryq kórgennen bastap orys, aǵylshyn, vengr, arab, nemis, serb jáne frantsýz tilderine aýdarylǵan.
