Ázerbaıjan Qazaqstanda ótetin V Dúnıejúzilik kóshpendiler oıyndaryna qatysady – Farıd Gaıbov
ÁZERBAIJAN. KAZINFORM - Ázerbaıjan V Dúnıejúzilik kóshpendiler oıyndaryna belsendi túrde qatysady. Bul týraly Qazaqstan Respýblıkasynyń Ázerbaıjandaǵy elshisi Álim Baıel men Ázerbaıjan Respýblıkasynyń Jastar jáne sport mınıstri Farıd Gaıbovtyń kezdesýinde aıtyldy.
Kezdesý barysynda Álim Baıel 2024 jylǵy 8-14 qyrkúıekte Astanada ótetin V Dúnıejúzilik kóshpendiler oıyndary týraly aqparat berdi. Dıplomat jarysqa álemniń ondaǵan eliniń ókilderi qatysatynyn, oıyndar aıasynda 20 jarys jáne 10 kórmelik saıystardy ótkizý josparlanǵanyn atap ótti. Olardyń qatarynda at jarystary, ulttyq jekpe-jek túrleri, dástúrli zııatkerlik oıyndar, sadaq atý, saıatshylyq, halyq oıyndary jáne t.b. bar.
Qazaq dıplomaty osy aýqymdy is-sharaǵa Ázerbaıjannyń qatysýynyń mańyzyn atap ótip, mınıstrdi oǵan arnaıy qonaq bolýǵa shaqyrdy. Sonymen qatar Qazaqstan elshisi bul is-shara Túrki memleketteri uıymyna Qazaqstan tóraǵalyǵynyń aıasynda ótetinin jáne kezekti ret búkil túrki álemin biriktiretinin atap ótti. Іs-shara túrki halyqtarynyń biregeı dástúrlerin nasıhattaý jáne olardy saqtaý boıynsha is-sharalarǵa serpin beredi.
Farıd Gaıbov Qazaqstanǵa shaqyrýdy rızashylyqpen qabyldap, Ázerbaıjannyń kezekti Dúnıejúzilik kóshpendiler oıyndaryna belsendi túrde qatysatynyn málimdedi. Suhbat barysynda Farıd Gaıbov Qazaqstan Elshisine Mınıstrliktiń jastar saıasaty salasyndaǵy jumysy jáne sportty damytý salasyndaǵy birqatar tabysty jobalary týraly da aqparat berdi. Mınıstr jańa sport nysandaryn salý jáne eski sport nysandaryn qalpyna keltirý jumystary júrgizilip jatqanyn atap ótti. Qazaq sportshylary da Ázerbaıjanda ótkiziletin is-sharalarǵa belsendi atsalysyp jatyr.
Kezdesý sońynda taraptar eki eldiń jastar saıasaty men sport salasyndaǵy yntymaqtastyǵynyń ári qaraıǵy perspektıvalaryn talqylady. Atap aıtqanda, Ázerbaıjan tarapy Qazaqstannyń qysqy sport túrlerin, onyń ishinde hokkeıdi damytýdaǵy tájirıbesine qyzyǵýshylyq tanytyp otyr.
