Ázerbaıjan Qazaqstan Prezıdentiniń jahandyq sý bastamasyn qoldady
ASTANA.KAZINFORM - Astana men Baký arasyndaǵy strategııalyq dıalogty nyǵaıtý aıasynda Ázerbaıjan Qasym-Jomart Toqaevtyń BUU qamqorlyǵymen halyqaralyq sý uıymyn qurý bastamasyna resmı túrde qoldaý bildirdi, dep habarlaıdy Kazinform agenttiginiń Bakýdegi tilshisi.
Bul týraly Ázerbaıjandaǵy Qazaqstan elshisi Álim Baıel men Ázerbaıjan Respýblıkasynyń klımat máseleleri jónindegi prezıdenttik ókili Muhtar Babaevtyń kezdesýinde aıtyldy.
Taraptar qorshaǵan ortany qorǵaý máselelerin, Kaspıı teńiziniń ekojúıesin saqtaý, aldaǵy birlesken is-sharalarǵa daıyndyq jáne halyqaralyq ekologııalyq bastamalardy ózara qoldaý máselelerin talqylady.
Álim Baıel Ázerbaıjan tarapyn taǵy da 22-24 sáýirde Astanada ótetin Aımaqtyq ekologııalyq sammıtke belsendi qatysýǵa shaqyrdy. Forýmnyń basty is-sharasy Kaspıı teńizi deńgeıiniń azaıý sebepterin zertteý boıynsha birlesken jumys tobynyń alǵashqy otyrysy bolady. Taraptar kezdesý Kaspıı teńizindegi ekologııalyq qaýipsizdiktiń biryńǵaı aımaqtyq júıesin qurý jolyndaǵy mańyzdy qadam bolady dep esepteıdi.
Kezdesý barysynda Prezıdent Qasym-Jomart Toqaevtyń BUU júıesinde tolyqqandy sý uıymyn qurý bastamasy da talqylandy.
Muhtar Babaev Ázerbaıjan Qazaqstan Prezıdentiniń bastamasyn tolyq qoldaıtynyn málimdep, ony jahandyq klımattyq qıyndyqtar aıasynda sý resýrstaryn basqarýda jınaqtalǵan máseleler turǵysynan óte ózekti dep atady.
- Bul uıymdy qurý ózekti, sebebi búgingi tańda sý máseleleri tek ekologııalyq sıpatta ǵana emes, qaýipsizdik pen ekonomıkalyq máselelerge tikeleı áser etedi, sondyqtan olardy júıeli túrde sheshý qajet, - dep atap ótti Ázerbaıjan Prezıdentiniń ókili.
Muhtar Babaev eki eldiń qorshaǵan ortany qorǵaý salasyndaǵy kúsh-jigeriniń sınergııasy búkil Kaspıı aımaǵynyń turaqty damýyna strategııalyq úles qosatynyn atap ótti.
Taraptar ekijaqty qarym-qatynastyń qazirgi dınamıkasyn joǵary baǵalap, qorshaǵan ortany qorǵaý salasyndaǵy seriktestikti odan ári nyǵaıtýǵa daıyn ekenin rastady.
Buǵan deıin BUU-da Qazaqstannyń UN Water halyqaralyq uıymyn qurý bastamasy tanystyrylǵanyn habarlaǵan edik.