Ázerbaıjan qaıratkerleri «Abaı 175 jyl» medalimen marapattaldy
Syrtqy ister mınıstrligi taratqan málimetke sensek, albomdy Abaıdyń 175 jyldyǵyna oraı Halyqaralyq túrki mádenıeti uıymy (TÚRKSOI) shyǵarǵan bolatyn.
Tusaýkeserge TÚRKSOI Bas hatshysy Dúısen Qaseıinov, Halyqaralyq túrki mádenıeti men murasy qorynyń prezıdenti Gıýnaı Efendıeva, Qazaqstan Elshisi Serjan Ábdikárimov, Ázerbaıjan-Qazaqstan respýblıkalyq dostyq qoǵamynyń vıtse-prezıdenti Eldar Ismaılov, sondaı-aq Ázerbaıjannyń ǵylymı jáne shyǵarmashylyq toptarynyń ókilderi qatysty.
Kezdesýge qatysýshylardyń aldynda sóz sóılegen D. Qaseıinov Abaı halyq aqyny, oıshyl jáne qazirgi qazaq ulttyq ádebıetiniń negizin qalaýshy bola otyryp, óz jurtyna ǵana emes, búkil túrki álemine de baı mura qaldyrǵanyn – onyń óleńderi men dana sózderi baýyrlas halyqtardyń mádenıet baılyǵy men rýhanııatyn pash etetinin atap ótti.
Іs-shara barysynda uly qazaq aqynynyń esimi men murasyn nasıhattaýǵa úles qosqan tulǵalarǵa «Abaı 175 jyl» estelik medali jáne qurmet gramotasy tapsyryldy.
Baký memlekettik ýnıversıteti (BMÝ) janyndaǵy Abaı atyndaǵy Qazaq tili, tarıhy jáne mádenıeti ortalyǵynyń jetekshisi Fatıma Dýrsýnova, BMÝ túrkologııa kafedrasynyń meńgerýshisi Ramıl Askarov, jýrnalıst-pýblıtsıst Aıda Eıvazova, jazýshy Narıman Abdýlrahmanly, Ázerbaıjan memlekettik pedagogıkalyq ýnıversıtettiń ádebıet kafedrasynyń professory Elman Gýlıev, BMÝ túrkologııa kafedrasynyń professory Fırýza Agaeva marapattarǵa ıe boldy.
Qonaqtarǵa Abaıdyń ómiri men shyǵarmashylyǵy týraly derekti rolık kórsetilip, qazaqtyń dástúrli taǵamdary usynyldy.
