Ázerbaıjan Kavkazdaǵy eń iri jel elektr stantsııasyn iske qosty
ASTANA. KAZINFORM – Bakýde Saýd Arabııasynyń ACWA Power jáne Qytaıdyń PowerChina kompanııalarynyń qatysýymen salynǵan 240 megavattyq «Hyzy-Absheron» jel elektr stantsııasyn resmı iske qosý rásimi ótti, dep habarlaıdy Ázerbaıjan prezıdentiniń saıty.
Saltanatty rásimde sóz sóılegen Ázerbaıjan prezıdenti Ilham Álıev jańartylatyn energııa kózderin damytý memlekettik saıasattyń negizgi basymdyǵy jáne eldiń energetıkalyq júıesin jańǵyrtýdyń mańyzdy basymdyqtarynyń biri ekenin atap ótti.
– Tórt jyl buryn – 2022 jyldyń qańtarynda bul zalda osy elektr stantsııasynyń irgetasyn qalaý rásimi ótti. Osy jyldar ishinde qarqyndy jumys júrgizildi jáne búgin biz bul tamasha oqıǵany birge atap ótip jatyrmyz. Birinshi kezekte ınvestor – ACWA Power kompanııasyna, onyń basshylyǵyna alǵysymdy bildirgim keledi. Bul – álemdegi jańartylatyn energııa kózderi salasyndaǵy jetekshi kompanııalardyń biri. Ol sondaı-aq ınvestor retinde bizdiń elimizde Kaspıı teńizin tuşylandyrý boıynsha alǵashqy jobany júzege asyrady, - dep atap ótti Álıev.
Prezıdent sonymen qatar jobanyń bas merdigeri PowerChina kompanııasyna jáne Ázerbaıjan energetıkterine alǵysyn bildirdi.
Stantsııa Absheron jáne Hızı aýdandary aýmaqtarynda salyndy, onda árqaısysynyń qýaty 6,5 MVt bolatyn barlyǵy 37 jel týrbınasy ornatyldy. Jobaǵa salynǵan jalpy ınvestıtsııa kólemi shamamen 340 mln AQSh dollaryn qurady. Elektr energııasyn óndirýdiń josparlanǵan jyldyq kólemi shamamen 1 mlrd kVt/saǵ quraıdy. Bul jyl saıyn shamamen 220 mln tekshe metr tabıǵı gazdy únemdeýge múmkindik ashyp, atmosferaǵa 400 myń tonnadan astam kómirqyshqyl gazynyń shyǵarylýyna jol bermeıdi.
Prezıdent Ilham Álıev Ázerbaıjannyń generatsııalyq qýaty keıingi 20 jylda úsh esege jýyq ósip, shamamen 10 GVt-qa jetkenin habarlady. 2030 jylǵa qaraı 6 GVt jel jáne kún elektr stantsııalaryn, al 2032 jylǵa qaraı 8 GVt-qa deıin paıdalanýǵa berý josparlanyp otyr. Kaspıı teńizi Ázerbaıjan sektory jel energetıkasynyń áleýeti 157 GVt-qa baǵalandy.
Saýd Arabııasy Koroldiginiń Energetıka mınıstriniń orynbasary Nasser Ál-Kahtanı «Hyzy-Absheron» jobasy Ázerbaıjan men Saýd Arabııasy arasynda «jasyl» energetıka salasyndaǵy strategııalyq seriktestiktiń basty úlgisi ekenin atap ótti.
QHR elshisi Lý Meı atap ótkendeı, stantsııa Ázerbaıjan men Kavkazdaǵy eń iri jel jobasy jáne ol 300 myńnan astam úı sharýashylyǵyn elektr energııasymen qamtamasyz etedi.
Buǵan deıin Ázerbaıjan prezıdenti Ilham Álıev 2025 jyldyń 21 qazanynda Astanada Qazaqstan men Ázerbaıjan arasynda qol qoıylǵan ekijaqty qujattardy bekitý týraly jarlyqtarǵa qol qoıǵanyn habarladyq.
Ázerbaıjan qazaqstandyqtardy nesimen qyzyqtyratynyn myna materıaldan oqı alasyz.