Ázerbaıjan kásipkerleri Atyraýdyń eksporttyq áleýetin zerttep jatyr
Kezdesýde qos tarap munaıly óńir men Ázerbaıjan arasyndaǵy saýda-ekonomıkalyq baılanystardy damytý jaıyn talqylady.
«Bizdiń aldymyzda birinshi kezekte aımaqqa ınvestıtsııa tartý, jańa jumys oryndaryn ashý, salyq túsimderin arttyrý, qos tarap arasyndaǵy saýda-ekonomıkalyq baılanysty damytý máselesi tur. Sondyqtan sizderdi taraptyq áriptestikti nyǵaıta túsýge shaqyramyn», - dedi Nurlan Noǵaev.
«Biz aımaqtyń ekonomıkalyq áleýetin zerdelep, birlesip jumys isteý úshin Atyraýǵa iri transulttyq kompanııalardyń ókilderin ákelip jatyrmyz. Bul saparymyzda aımaqtyń eksporttyq áleýetin zerttesek deımiz», - dedi elshi.
Aıta keteıik, Atyraýda Ázerbaıjan kapıtaly bar 42 kásiporyn jumys isteıdi. Olardyń ishinde metall óńdeýmen, dárigerlik qyzmet kórsetýmen, daıyn tamaq ónimderin óndirýmen aınalysatyn kompanııalar bar. Qos tarap arasyndaǵy taýar aınalymy 2017 jyldyń 4 aıy ishinde 1,8 mıllıon AQSh dollaryn quraǵan. Atyraý oblysy Ázerbaıjanǵa negizinen tuşy sýda mekendeıtin balyq, kúkirti bar gazoıl men mazýt, gaz qubyrlary jáne basqa da ónimderdi shyǵarady.
Oblysta qazir jalpy aýmaǵy 210 gektar Indýstrıaldy aımaq qurylyp jatyr. Aımaqta álemdik standarttarǵa saı ónerkásiptik-óndiristik keshender qurý josparlanǵan.
Investorlar memlekettik-jekemenshik seriktestik sheńberinde «Atyraý» áleýmettik kásipkerlik korporatsııasy» ulttyq kompanııasy» AQ-men birlesip ártúrli salada ınvestıtsııalyq jobalaryn júzege asyra alady. Aıta ketetin jaıt, birlesip jumys isteý kezinde ulttyq kompanııanyń úlesi 49 protsentten aspaýy kerek.
Oblysta ınvestıtsııalyq ahýaldy jaqsartý baǵytynda «Atyrau Innovations» JShS qurylǵan. Mekemeniń maqsaty bir tereze qaǵıdasymen ınvestorlarǵa aqparattyq, servıstik qoldaý kórsetý.
