Ázerbaıjan Islam azyq-túlik qaýipsizdigi uıymyna qosyldy
ASTANA. KAZINFORM – Bakýde ótken 19-shy Ázerbaıjan halyqaralyq aýyl sharýashylyǵy kórmesi men forýmy aıasynda Ázerbaıjannyń Islam azyq-túlik qaýipsizdigi uıymyna qosylýy týraly kelisimge qol qoıyldy.
Qujatqa Ázerbaıjannyń aýyl sharýashylyǵy mınıstri Májnún Mamedov qol qoıdy. Osylaısha el azyq-túlik qaýipsizdigin nyǵaıtý, turaqty aýyl sharýashylyǵyn damytý jáne agrarlyq saladaǵy halyqaralyq yntymaqtastyqty keńeıtý baǵytynda jumys isteıtin kópjaqty platformaǵa resmı túrde múshe boldy.
Saltanatty rásim barysynda Ózbekstan tarapy da tıisti qujatqa qol qoıdy.
Іs-sharaǵa Islam azyq-túlik qaýipsizdigi uıymynyń bas dırektory Berik Aryn, Islam yntymaqtastyǵy uıymy Bas hatshylyǵynyń ókili Nýra ál-Zahranı, Qazaqstannyń Ázerbaıjandaǵy Tótenshe jáne ókiletti elshisi Álim Baıel, halyqaralyq uıymdar men forým delegatsııalarynyń ókilderi qatysty.
Berik Aryn uıymǵa jańa múshelerdiń qosylýy memleketter arasyndaǵy ózara is-qımyldy kúsheıtip, azyq-túlik qaýipsizdigi salasyndaǵy zamanaýı syn-qaterlerge birlesip áreket etý tetikterin damytýǵa yqpal etetinin aıtty.
– Islam azyq-túlik qaýipsizdigi uıymyna múshelik Ázerbaıjanǵa halyqaralyq baǵdarlamalar men bastamalarǵa qatysýǵa múmkindik beredi. Onyń ishinde agroónerkásip sektoryna ınnovatsııalyq sheshimderdi engizý, azyq-túlik qaýipsizdigin basqarý júıelerin damytý jáne óńirlik yntymaqtastyqty keńeıtý jobalary bar, – dedi uıym basshysy.
Islam azyq-túlik qaýipsizdigi uıymy Qazaqstannyń bastamasymen qurylyp, 2016 jyly jumysyn bastaǵan. Uıymnyń shtab-páteri Astanada ornalasqan. Qazir ol Azııa, Afrıka jáne arab elderin biriktiretin mańyzdy halyqaralyq alańǵa aınaldy.
Aıta keteıik, Bakýdegi qaıyrymdylyq jármeńkesi Qazaqstan men Ázerbaıjannyń mádenı baılanysyn nyǵaıtty.
