Ázerbaıjan Irandaǵy elshiliginiń jumysyn qaıta bastady
ASTANA. KAZINFORM – Ázerbaıjan Respýblıkasynyń Iran Islam Respýblıkasyndaǵy elshiligi 12 sáýirden bastap jumysyn qaıta bastady, dep habarlaıdy eldiń Syrtqy ister mınıstrligi.
Vedomstvo málimetinshe, bastapqy kezeńde elshilik shekteýli quramda jumys isteıdi. Onyń quramyna elshi, sondaı-aq birqatar dıplomatııalyq jáne ákimshilik qyzmetkerler kiredi.
– Qaýipsizdik máseleleri men uıymdastyrýshylyq aspektilerdi eskere otyryp, elshiliktiń qyzmeti kezeń-kezeńimen retteletin bolady, – delingen syrtqy saıası vedomstvonyń málimdemesinde.
Sondaı-aq dıplomatııalyq ókildiktiń jumysyn qaıta bastaý Irandaǵy áskerı is-qımyldardyń toqtaýy jáne eki aptalyq bitim rejıminiń jarııalanýynan keıin júzege asqany atap ótildi. Bul qadam Ázerbaıjannyń kórshiles ári dostas Iranmen qarym-qatynasqa erekshe mán beretinin kórsetedi.
Syrtqy ister mınıstrligi óńirde beıbitshilik pen turaqtylyqty qamtamasyz etýge baǵyttalǵan bastamalardy qoldaıtynyn taǵy da málimdedi.
Aıta keteıik, óńirdegi shıeleniske baılanysty Ázerbaıjan buǵan deıin Tegeran men Tebrız qalalaryndaǵy dıplomatııalyq ókildikter qyzmetkerlerin evakýatsııalaý týraly sheshim qabyldaǵan.
Keıin taraptar memlekettik shekara arqyly júk tasymalyn qaıta jandandyrdy.
Sondaı-aq Baký Iranǵa gýmanıtarlyq kómek joldaǵan.
