Ázerbaıjan-Iran shekarasyndaǵy qarýly qaqtyǵys: esirtki men drondar anyqtaldy
ASTANA. KAZINFORM — Ázerbaıjan-Iran shekarasynda qarýly qarsylyq kórsetip, memlekettik shekarany zańsyz kesip ótý jáne drondar arqyly esirtki tasymaldaý áreketteri tirkeldi, dep habarlaıdy Kazinform agenttiginiń Ázerbaıjandaǵy menshikti tilshisi.
Ázerbaıjannyń Memlekettik shekara qyzmetiniń habarlaýynsha, qarýly oqıǵa «Geıtepe» shekara jasaǵynyń jaýapkershilik aımaǵynda bolǵan. Shekarashylar Iran aýmaǵynan Ázerbaıjanǵa qaraı bet alǵan bir top adamdy baıqaǵan.
Shekarashylar topty baıqaǵan soń aýmaqty qorshaýǵa alyp, olarǵa toqtaýdy talap etken. Alaıda top músheleriniń biri eskertýdi elemeı, jaýyngerlerge oq atqan. Buǵan jaýap retinde shekarashylar qarý qoldanǵan. Nátıjesinde oq atqan adam zalalsyzdandyryldy.
«Goradız» jáne «Geıtepe» shekara jasaqtarynyń jaýapkershilik aımaǵynda da zańbuzýshylyq derekteri tirkeldi. Atap aıtqanda, Irannan 22 keli 900 gramm esirtki zatyn zańsyz alyp ótpek bolǵan áreketterge tosqaýyl qoıyldy. Budan bólek jedel-áskerı is-sharalar kezinde eldiń áýe keńistigin zańsyz kesip ótken drondar anyqtalyp, isten shyǵaryldy.
«Goradız» shekara jasaǵynyń aýmaǵynan 15 keli 400 gramm, al «Geıtepe» shekara jasaǵynyń aýmaǵynan 7 keli 500 gramm esirtki tárkilendi. Qarýly oqıǵaǵa qatysty Iran tarapyna shekara ókilderi arqyly resmı aqparat berildi. Qarý qoldaný deregi boıynsha qylmystyq is qozǵaldy. Eki oqıǵaǵa qatysty jedel-izdestirý jáne tergeý amaldary jalǵasyp jatyr.
Buǵan deıin Grýzııa men Ázerbaıjannyń shekarany belgileý jumysyn jandandyryp jatqanyn habarlaǵan edik.
