Ázerbaıjan-Iran shekarasynda júk tasymaly toqtatyldy
ASTANA.KAZINFORM — Ázerbaıjan Mınıstrler Kabınetiniń sheshimimen Iranmen memlekettik shekara arqyly júk kólikteriniń qozǵalysy ýaqytsha toqtatyldy, dep habarlaıdy Kazinform agenttiginiń Bakýdegi tilshisi Mınıstrler Kabınetine silteme jasaı otyryp.
— Halyqaralyq quqyq normalary men qaǵıdattaryna qaıshy keletin osy shabýyldardan týyndaǵan jaǵdaıdy eskere otyryp, Mınıstrler Kabınetiniń sheshimimen Ázerbaıjan men Iran arasyndaǵy barlyq shekara ótkeli arqyly júk kólikteriniń (tranzıttik kólikterdi qosa alǵanda) qozǵalysy ýaqytsha jáne tolyǵymen toqtatyldy, — delingen málimdemede.
Bul shara 5 naýryzda Iran Islam Respýblıkasynyń aýmaǵynan Nahchyvan avtonomııalyq respýblıkasyndaǵy azamattyq ınfraqurylymǵa jasalǵan dron shabýyldarynan keıin engizildi.
Shabýyl Nahchyvandaǵy halyqaralyq áýejaıǵa, mektepke jáne basqa da nysandarǵa baǵyttalǵan. Birneshe beıbit turǵyn jaraqat aldy, al áýejaı termınalynyń ǵımaraty zaqymdaldy.
Sarapshylardyń pikirinshe, jaǵdaı qysqa merzimde aımaqtyq saýda aınalymyn azaıtyp, jetkizý tizbekterindegi kidiriske ákelýi múmkin. Degenmen uzaq merzimdi perspektıvada bul sheshim aımaqtaǵy kólik baǵyttaryn qaıta bólýge jáne balama dálizderdiń mańyzdylyǵynyń artýyna ákeletinin joqqa shyǵarýǵa bolmaıdy.
Aıta keteıik, Prezıdent Qasym-Jomart Toqaev Irannyń ushqyshsyz ushý apparattary Nahchyvan qalasyndaǵy áýejaıdy atqylaýyna baılanysty ustanymyn málimdedi.
Memleket basshysy baýyrlas, odaqtas Ázerbaıjan eline qarsy jasalǵan áreketti qatań aıyptaıdy.
Prezıdent bolǵan oqıǵanyń mán-jaıy Iran tarapymen birlesip egjeı-tegjeıli tergeletinine, sondaı-aq eki el arasyna syzat salǵan jaǵdaı aımaqtaǵy ahýaldy ýshyqtyrmaý úshin dıplomatııalyq tásilder arqyly retteletinine senim bildirdi.