Ázerbaıjan gazy Avstrııa men Germanııa naryǵyna shyǵa bastady

ASTANA. KAZINFORM — Ázerbaıjan Respýblıkasynyń memlekettik munaı kompanııasy (SOCAR) Ońtústik gaz dáliziniń eýropalyq bóligi — Transadrıatıkalyq qubyr (TAP) arqyly Avstrııa men Germanııaǵa tabıǵı gazdy jetkize bastady. Bul týraly Sınhýa agenttigi jazdy.

SOCAR 2026 jyldyń qańtar aıynda bastalǵan jetkizilimder Ońtústik jáne Ortalyq Eýropadaǵy tutynýshylarǵa júrgizilip jatqanyn habarlady. Avstrııa men Germanııaǵa jetkizilimderdiń bastalýymen Ázerbaıjan qubyr gazyn ımporttaýshy elderdiń jalpy sany 16-ǵa jetti.

SOCAR jetkizýdi keńeıtý Ázerbaıjannyń uzaq merzimdi energetıkalyq strategııasyna sáıkes keletinin jáne onyń Eýropaǵa senimdi energııa jetkizýshisi mártebesin nyǵaıta túsetinin atap ótti.

Uzyndyǵy 3500 shaqyrymnan asatyn Ońtústik gaz dálizi Kaspıı teńizi aımaǵyn, atap aıtqanda, Shah-Denız gaz ken ornyn eýropalyq naryqtarmen baılanystyrady.

Aıta keteıik, Armenııa men Ázerbaıjan shekaradaǵy temirjol ınfraqurylymyn jetildirýge kiristi.