Ázerbaıjan Eýropaǵa gaz eksportyn 56%-ǵa arttyrdy
ASTANA.KAZINFORM – Baký qalasynda Ońtústik gaz dálizi jónindegi konsýltatıvtik keńestiń 12-shi mınıstrlik otyrysy jáne jasyl energetıka jónindegi konsýltatıvtik keńestiń 4-shi otyrysy ótti. Jıynǵa Eýropa, AQSh, Túrkııa, Qazaqstan jáne ózge elderdiń mınıstrleri men energetıkalyq kompanııa ókilderi qatysty, dep habarlaıdy Kazinform agenttiginiń menshikti tilshisi.
Ázerbaıjannyń energetıka mınıstri Parvız Shahbazov álem «elektr energııasy dáýirine» qadam basqanyn, alaıda tabıǵı gaz aldaǵy onjyldyqtarda energetıkalyq qaýipsizdiktiń negizgi kózi bolyp qala beretinin málimdedi. 2021 jyldan beri Ázerbaıjan Eýropaǵa gaz eksportyn 56%-ǵa ulǵaıtqan. 2025 jyly jalpy eksport kólemi 25,2 mlrd tekshe metr bolyp, onyń jartysynan astamy EO elderine jetkizilgen.
Transadrıatıkalyq gaz qubyry qýaty 1,2 mlrd tekshe metrge keńeıtildi. Aldaǵy jyldary tórt jańa gaz jobasyn iske qosý josparlanyp otyr, sonyń ishinde «Azerı–Chırag–Gıýneshlı» blogyndaǵy alǵashqy ilespe emes gaz óndirý jobasy bar.
Mańyzdy oqıǵa retinde Birikken Arab Ámirlikteriniń memlekettik munaı kompanııasy — ADNOC-tyń Ońtústik gaz dáliziniń kapıtalyna kirýi ataldy. Bul Eýropaǵa jetkizilimderdi ulǵaıtýǵa jańa múmkindikter ashady.
Ázerbaıjan jańartylatyn energetıkany da belsendi damytyp keledi. 8 GVt qýat ishki tutynýǵa, eksportqa jáne derekter ortalyqtaryn qamtamasyz etýge baǵyttalǵan. Kaspıı — Qara teńiz — Eýropa, Ázerbaıjan — Túrkııa — Eýropa baǵyttary, Transkaspıı jáne Shyǵys — Batys jasyl dálizderi ilgeriletilýde.
Tranzıt elder ınfraqurylymnyń strategııalyq rólin rastady. Grýzııa 2036 jylǵa qaraı elektr energııasymen tolyq ózin-ózi qamtamasyz etýdi josparlap otyr. Bolgarııa, Moldova jáne Serbııa gaz júıesin Eýropamen yqpaldastyrýdy keńeıtýde. AQSh pen Ulybrıtanııa dálizdiń Eýropanyń energetıkalyq qaýipsizdigi úshin mańyzyn atap ótti.
Qazaqstan Ázerbaıjan jáne Ózbekstanmen birlesip, shyǵaryndylardy azaıtýǵa jáne óńirlik energetıkalyq turaqtylyqty nyǵaıtýǵa baǵyttalǵan jasyl energııa óndirý jáne tasymaldaý boıynsha iri jobany júzege asyrýda.
Jıyn jumysyna SOCAR, bp, TANAP, TAP, TotalEnergies, XRG, halyqaralyq damý bankteri men konsaltıngtik kompanııalar qatysty. Jasyl energetıka sessııasynda halyqaralyq ınvestorlardyń qatysýymen jańa elektr jelileri baılanystary men jasyl generatsııa jobalary talqylandy.
Aıta ketelik Ázerbaıjan men AQSh strategııalyq seriktestik týraly Hartııaǵa qol qoıǵan edi.