Ázerbaıjan Eýroodaqqa tabıǵı gaz jetkizetin jetekshi elderdiń birine aınaldy
ASTANA. KAZINFORM – Bul týraly Ázerbaıjan Prezıdenti Ilham Álıev IV Shýsha jahandyq medıaforýmynyń ashylýynda málimdedi. Bul jóninde Kazinform agenttiginiń oqıǵa ornyndaǵy menshikti tilshisi habarlady.
— Biz Eýroodaqtyń birneshe elimen kelissóz júrgizip jatyrmyz. Halyqaralyq gaz jetkizýdi júzege asyryp qana qoımaı, onyń kólemin de ulǵaıtyp kelemiz. Bul baǵytta naqty suranystar tústi. Búginde Ázerbaıjannyń senimdi, qoljetimdi ári balamaly gaz jetkizýshi retindegi róli on jyl burynǵydan áldeqaıda mańyzdy bola tústi, — dedi Ilham Álıev.
Prezıdenttiń aıtýynsha, bıyl Ázerbaıjan tabıǵı gaz eksportyn Aýstrııa men Germanııaǵa bastady. Onyń sózinshe, Eýropa men álemdik naryqtaǵy eldiń ustanymyn nyǵaıtý — Bakýdiń uzaqmerzimdi strategııasynyń bir bóligi.
Ilham Álıev qazirgi ýaqytta Ázerbaıjan qubyr arqyly tabıǵı gazdy 16 elge eksporttap otyrǵanyn jáne aldaǵy ýaqytta jetkizý kólemin ulǵaıtýdy kózdeıtinin aıtty.
Onyń pikirinshe, tıimdi baǵa qalyptasqandyqtan, Eýropa naryǵy eń tartymdy baǵyt bolyp qala beredi. Prezıdent jetkizý kólemin odan ári arttyrý úshin jergilikti seriktestermen uzaqmerzimdi kelisimshart jasasý jáne gaz tasymaldaý ınfraqurylymyn birlesip damytý qajet ekenin atap ótti.
Eske salsaq, IV Shýsha jahandyq medıaforýmy 13–14 shilde kúnderi «Beıbitshilikti ilgeriletýdegi medıanyń mıssııasy: shyndyqty qalpyna keltirý jáne senimdi jańǵyrtý» uranymen ótip jatyr.
Forýmǵa 54 elden shamamen 160 BAQ ókili, sarapshy, medıa uıymdarynyń jetekshileri, sondaı-aq halyqaralyq uıymdar men kompanııalardyń ókilderi qatysýda.
Іs-shara qoǵamdar arasyndaǵy senimdi nyǵaıtý, tsıfrlyq yntymaqtastyqty damytý jáne qazirgi jaǵdaıda jaýapty jýrnalıstıkanyń rólin arttyrý máselelerine arnalǵan.
Buǵan deıin Ázerbaıjan «jasyl» energetıkany damytý arqyly jyl saıyn 1,5 mlrd tekshe metr tabıǵı gazdy únemdeıtini habarlanǵan bolatyn.
Aıta ketelik Qazaqstan men Ázerbaıjan arasynda taǵy 2 jańa áýe baǵyty ashylatyny týraly jazǵan edik.
