Ázerbaıjan elinde G.Álıevtiń týǵan kúni eske alý datasy retinde atalyp ótiledi

Sonymen birge bul kún eger senbi ne jeksenbige sáıkes kelmese jumys kúni bolyp sanalady ári memlekettik mereke emes. Degenmen, atalyp ótýi jaǵynan basqa da meıramdardan birde-bir kemdigi joq. Geıdar Álıevtiń týǵan kúninde Bakýde jylsaıynǵy «Gúlder merekesin» ótkizý dástúrge aınalǵan.

Buǵan qosa, eske qalarlyq datanyń aldynda, ádette 2 apta buryn Bakýde jáne eldiń  basqa da óńirlerinde «Geıdar Álıev mektebi» dástúrli sabaqtary men taqyryptyq ǵylymı-tájirıbelik konferentsııa ótkiziledi.

Aǵymdaǵy jyldyń mamyr aıynda Ázerbaıjan Respýblıkasynyń bilim mınıstri jalpy bilim beretin oqý oryndarynda jyl saıyn 10 mamyrda jalpyulttyq kóshbasshy Geıdar Álıevtiń ómiri men qyzmetine arnalǵan taqyryptyq sabaqtar ótkizý týraly buıryqqa qol qoıdy. Oǵan qosa atalǵan sabaqtar oqý kúniniń basynda da ótkizilýi tıis.

Budan bólek memlekettik mekemelerdiń eńbek ujymdarynyń jáne respýblıkadaǵy barlyq uıymdardyń ókilderine Geıdar Álıevtiń murajaı mektepterinde, bıleýshi «Enı Ázerbaıjan»  partııasy bólimsheleriniń ne bolmasa joǵaryda atalǵan uıymdardyń májilis zaldarynda Geıdar Álıevtiń ómiri men qyzmetine, onyń memlekettik táýelsizdikti saqtaý men nyǵaıtýǵa qosqan úlesin baǵalaýǵa arnalǵan dáris ótkiziledi.

Atalǵan sharalar partııalyq uıymdar basshylarynyń, qoǵamdyq belsendilerdiń, parlament depýtattarynyń, memlekettik qurylymdardyń basshylyq quramdary ókilderiniń, ǵalymdardyń, shyǵarmashylyq zııaly qaýym ókilderiniń qatysýmen ótkiziledi.

Ataýly kún qarsańynda Geıdar Álıevke arnaǵan saltanatty is-shara bolady. Oǵan memleket, parlament basshylary, dıplomatııalyq korpýs ókilderi, zııaly qaýymnyń kórnekti ókilderi qatysady. Bul is-sharanyń basty oqıǵasy el prezıdentiniń sóz sóıleýi bolyp tabylady. Alqaly jıynnyń aıaqtalýyna oraı merekelik kontsert qoıylady.

Merekege bir kún qalǵanda búkil elde senbilik ótip, aǵash otyrǵyzylady, kósheler men aýlalar abattandyrylady. Óıtkeni mundaı is-sharalarǵa Geıdar Álıev zor kóńil bólgen bolatyn. Sondyqtan da ony este qaldyrý maqsatynda eldiń kóptegen qalalarynda saıabaqtar jasalǵan, olardyń barlyǵyn da halyq Geıdar saıabaǵy dep ataıdy.

Atalǵan is-sharalardyń barlyǵy buqaralyq aqparat quraldarynda keńinen jarııa etiledi.

Atalyp ótiletin merekeniń eń basty negizgi sharty Geıdar Álıevtiń monýmentine gúl sebetin qoıý rásimi bolyp tabylady. Sonymen qatar Bakýdegi qurmetpen jerleý alleıasyndaǵy Geıdar Álıevtiń qabirine de gúldestesi qoıylady. Bul sharaǵa prezıdentten bastap eldiń barlyq saıası basshylyǵy, sonymen qatar Geıdar Álıev otbasynyń músheleri de qatysady.

Aıta keterligi, Ázerbaıjannyń shet elderdegi elshilikteri sol memleketterdegi dıasporalyq uıymdardyń belsendi qatysýymen óz otandarynyń aýmaǵynan tysqary jerlerde de bul kúndi  keńinen atap ótedi.  Bul rette TMD elderine, onyń ishinde Qazaqstanǵa, sonymen qatar Geıdar Álıevtiń ómiri men qyzmeti baılanysty bolǵan óńirlerge basa ekpin beriledi.

Bakýde jáne respýblıkanyń barlyq óńirlerinde kontsertter uıymdastyrylyp, kóbinese jalpyulttyq kóshbasshynyń esimimen atalatyn  saıabaqtarda tanymal ánshilerdiń, respýblıkanyń jetekshi shyǵarmashylyq ujymdarynyń qatysýymen jalpyhalyqtyq saýyq-saıran ótkiziledi.

Bul ataýly kúnniń sharyqtaý shegi dástúri túrde Bakýdegi Geıdar Álıev saıabaǵynda bolatyn «Gúlder merekesimen» jalǵasady.  «Gúlder merekesimen»  baılanysty ótetin is-shara úshin Bakýge Gollandııa, Italııa, Frantsııa jáne Germanııadan gúlderdiń kóptegen túri jetkiziledi.

Gúlderden túrli kórkemdik kompozıtsııalar jasalady. Bul ispen jergilikti dızaınerlermen birge Germanııa, Gollandııa, Frantsııanyń jáne basqa da memleketterdiń mamandary aınalysady. Merekeniń mindetti sharty - túrli suryptaǵy ári tústegi gúlderden Geıdar Álıevtiń florıstıkalyq beınesin jasaý.

Bul shara 10 mamyr kúni saǵat 11:00-den 19:00-ge deıin Geıdar Álıev atyndaǵy saraıdyń aldyndaǵy saıabaqta ótkiziledi, al 21:00-de Ulttyq saıabaqta ádette merekelik kontsert uıymdastyrylady. Ony  jergilikti atqarýshy bılik pen Geıdar Álıev negizin qalap, basshylyq jasaǵan «Enı Ázerbaıjan» bılik partııasy, sonymen qatar Geıdar Álıev qory uıymdastyrady.