Ázerbaıjan elektrondy temekilerdi zań júzinde tolyq aınalymnan alyp tastamaq
ASTANA. KAZINFORM — Ázerbaıjanda elektrondy temekiler men olardyń quramdas bólikterin azamattyq aınalymda ustaýǵa tyıym salynǵan zattardyń resmı tizimine engizý usynyldy. Bul týraly Kazinform agenttiginiń Bakýdegi menshikti tilshisi habarlady.
Tıisti zańǵa engiziletin túzetýler parlamenttiń Agrarlyq saıasat komıtetiniń otyrysynda qaraldy.
Zańnamalyq ózgeris 2025 jylǵy 30 jeltoqsanda kúshine engen zań talaptaryna sáıkestendirý maqsatynda ázirlengen. Atalǵan zańǵa sáıkes, elde elektrondy temekiler men olardyń quramdas bólikterin ımporttaýǵa, eksporttaýǵa, óndirýge, saqtaýǵa, kóterme jáne bólshek saýdada satýǵa, sondaı-aq paıdalanýǵa tyıym salynǵan.
Endi túzetýler qabyldanǵan jaǵdaıda elektrondy temekiler azamattyq aınalymnan shyǵarylǵan zattardyń resmı tizimine engizilip, qoldanystaǵy tyıym zań júzinde tolyq bekitiledi.
Buǵan deıin Ázerbaıjanda elektrondy temekini paıdalaný, ımporttaý, eksporttaý, óndirý, kóterme jáne bólshek saýdada satý, sondaı-aq ótkizý maqsatynda saqtaý úshin aıyppul belgilengenin jazdyq.
Sonymen qatar elde kraýdfandıng salasyndaǵy zań buzýshylyqtar úshin de aıyppul engizý usynylyp otyr.
1 sáýirden bastap Ázerbaıjanda elektrondy temekilerdiń aınalymy men qoldanylýyna tolyq tyıym salatyn aýqymdy zańnamalyq ózgerister kúshine endi.
Buǵan qosa, Ázerbaıjan bıligi zańsyz qumar oıyn bıznesine qatysty jaýapkershilikti kúsheıtýdi josparlap otyrǵany buǵan deıin habarlanǵan edi.
