Ázerbaıjan Dúnıejúzilik qalalar forýmy tóraǵalyǵyn Meksıkaǵa tapsyrdy
ASTANA.KAZINFORM - Bakýde BUU Dúnıejúzilik qalalyq forýmynyń (WUF13) 13-shi sessııasynyń resmı jabylý rásimi ótti, onyń barysynda forýmnyń tóraǵalyǵy Ázerbaıjannan Meksıkaǵa tapsyryldy, dep habarlaıdy Kazinform agenttiginiń menshikti tilshisi.
17-22 mamyr aralyǵynda Bakýde «Barlyǵyna arnalǵan baspana: qaýipsiz jáne turaqty qalalar men qaýymdastyqtar» taqyrybynda WUF13 forýmy ótti. BUU Ázerbaıjan úkimetimen birlesip uıymdastyrǵan bul is-shara turaqty qalalyq damýdyń eń iri halyqaralyq platformasyna aınaldy.
Uıymdastyrýshylardyń málimeti boıynsha, forýmǵa 176 elden 57 000-nan astam adam qatysty, onyń ishinde memleket jáne úkimet basshylary, mınıstrler, merler, halyqaralyq uıymdardyń, bıznestiń, akademııalyq ortanyń jáne azamattyq qoǵamnyń ókilderi bar.
Forýmnyń negizgi nátıjeleriniń biri jahandyq turǵyn úı daǵdarysyn sheshýge arnalǵan «Baký is-qımylǵa shaqyrýy» atty qorytyndy qujattyń tusaýkeseri boldy. Qujatta qoljetimdi jáne turaqty turǵyn úı qurylysyn damytý, kóp deńgeıli basqarýdy nyǵaıtý jáne qala qurylysyndaǵy halyqaralyq yntymaqtastyqty keńeıtý talap etildi.
WUF13 resmı jabylýy Baký Olımpıada stadıonynda Ázerbaıjan men BUU týlaryn túsirý rásimimen aıaqtaldy.
Dúnıejúzilik qalalar forýmynyń kelesi, 14-shi sessııasy 2028 jyly Mehıko qalasynda ótedi.
Buǵan deıin Almaty ákimdigi Bakýdegi qalalar forýmynda ekologııalyq joba tanystyrǵany habarlanǵan bolatyn.
