Ázerbaıjan bıýdjettiń besten bir bóligin qorǵanys pen qaýipsizdikke bóledi

ASTANA. KAZINFORM – Eldiń bıýdjettik saıasatyndaǵy osy salanyń basymdylyǵyn saqtaı otyryp, aldaǵy jyly respýblıkanyń qorǵanys salasyna jumsalatyn shyǵyndary 3 paıyzǵa artyp, barlyq bıýdjet shyǵyndarynyń 21 paıyzyn quraıtyn bolady, dep habarlaıdy Ázerbaıjannyń Qarjy mınıstrligi. 

Vedomstvonyń málimetinshe, Ázerbaıjannyń 2026 jylǵa arnalǵan memlekettik bıýdjetiniń jobasynda «qorǵanys jáne ulttyq qaýipsizdik» shyǵyndary 8 mlrd 714,8 mln manat (shamamen 5,1 mlrd dollar) deńgeıinde qarastyrylǵan. 

Qorǵanys salasynan basqa, bilimge (2,9 mlrd dollar), áleýmettik qorǵaýǵa (2,8 mlrd dollar) jáne ekonomıkany damytýǵa (4,4 mlrd dollar) qomaqty qarjy bólinetin bolady.

Jalpy, 2026 jylǵa arnalǵan bıýdjet kirisi 38 mlrd 423 mln manat, shyǵysy 41 mlrd 548,6 mln manat kóleminde bolady dep boljanyp otyr. Tapshylyq 3 mlrd 125,6 mln manatty nemese JІÓ-niń 2,3 paıyzyn quraıdy. 

Ony jabýdyń negizgi kózderi – memlekettik qaryz alý, qazynashylyq shottaǵy qarajat jáne jekeshelendirý túsimderi.

Esepteý boıynsha, kirister qurylymynda munaı-gaz sektory túsimderdiń 42,6%-yn, al shıkizattyq emes sektordyń úlesi 57,4%-dy quraıdy. 

Bıýdjettik esepterde Ázerbaıjan munaıynyń baǵasy barreline 65 dollar bolyp belgilengen. 
Osylaısha, Ázerbaıjan 2026 jyly armııa men qaýipsizdik kúshterin qarjylandyrýdyń turaqty deńgeıin saqtaıdy.

2024 jyldyń sońynda Ázerbaıjan 2025 jylǵa arnalǵan memlekettik bıýdjette qorǵanys pen ulttyq qaýipsizdikke jumsalatyn qarajat mólsherin ulǵaıtýdy kózdep otyrǵanyn jazǵan bolatynbyz.