Ázerbaıjan Bolgarııaǵa jetkiziletin gaz kólemin eki ese arttyrdy

ASTANA. KAZINFORM - Bul Ázerbaıjan Bolgarııanyń «kógildir otynǵa» degen suranysynyń basym bóligin qanaǵattandyrady degen sóz, dep jazady Kazinform tilshisi.  

Ázerbaıjannyń Bolgarııaǵa jyl saıynǵy gaz jetkizý kólemi 2024 jyly 2 mıllıard tekshe metrdi qurady, dep habarlady Ázerbaıjannyń Sofııadaǵy elshisi Gýseın Gýseınov.

— Biz jetkiziletin gaz kólemin 1 mıllıard tekshe metrden 1,2 mıllıard tekshe metrge, keıin 1,5 mıllıard tekshe metrge deıin ulǵaıta bastadyq, al ótken jyldyń sońynda Ázerbaıjannan jetkizilgen gaz kólemi 2 mıllıard tekshe metrge jetti. Bul qazirgi ýaqytta Bolgarııanyń kógildir otynǵa degen suranysynyń basym bóligin qamtamasyz etip otyrǵanymyzdy bildiredi, - dedi dıplomat.

Ol 2013 jyly Ázerbaıjannyń memlekettik munaı kompanııasy «Býlgargaz» kompanııasymen Bolgarııaǵa jyl saıyn 1 mıllıard tekshe metr gaz jetkizý týraly 25 jyldyq kelisimge qol qoıǵanyn eske saldy.

Elshi Bolgarııadaǵy energetıkalyq daǵdarystan keıin Ázerbaıjan osy eldiń suranysy boıynsha «kógildir otyn» jetkizýdi arttyra bastaǵanyn atap ótti.

Gýseınov sondaı-aq 2022 jyly Ázerbaıjannyń EO-men energetıka salasyndaǵy strategııalyq seriktestik boıynsha ózara túsinistik týraly memorandýmǵa qol qoıǵanyn eske saldy.

Onyń aıtýynsha, Ázerbaıjan qazir Eýropanyń 12 eline gaz eksporttaıdy.

- Bolgarııany Ázerbaıjan gaz tranzıti boıynsha óte mańyzdy el retinde qarastyrady, óıtkeni sizdiń elde ishki gaz tasymaldaý jelisi damyǵan,- dep túıindedi dıplomat.

Qańtar aıynyń basynda Ázerbaıjan Bolgarııa men Serbııaǵa gaz jetkizýdi ýaqytsha toqtatqan bolatyn. Buǵan Kaspıı teńizindegi Shah Deniz Alpha (SDA) platformasyndaǵy tehnıkalyq aqaý sebep boldy. Keıinirek 18 qańtarda tehnıkalyq operator BP platformanyń qubyrdy jóndeýden keıin qaıta paıdalanýǵa berilgenin habarlady.

Osyǵan deıin Ázerbaıjan Sırııaǵa gýmanıtarlyq kómek jiberetinin habarlaǵan bolatyn.