Ázerbaıjan bıligi densaýlyǵyna qaýip tóngen balany ata-anasynan alyp qoımaq

Ázerbaıjanda balanyń ómirine nemese densaýlyǵyna tikeleı qaýip tóngen jaǵdaıda quzyrly organdar ony ata-anasynan alyp ketýi múmkin. Kazinform bul týraly Trend.az saıtyna silteme jasap habarlaıdy.

Mıllı Medjlıstiń (parlament) otbasy, áıelder jáne balalar máselesi jónindegi komıtetiniń otyrysynda ózgeris engizilip jatqan «Turmystaǵy zorlyq-zombylyqtyń aldyn alý týraly» Ázerbaıjan Respýblıkasynyń zańy talqylandy.

Zań jobasyna sáıkes, turmystaǵy zorlyq-zombylyqtan zardap shekken kámeletke tolmaǵandardyń quqyǵy men zańdy múddesin qorǵaý, onyń ishinde Ázerbaıjan Otbasy kodeksiniń 72-babynda belgilengen negizder bolǵan jaǵdaıda (balanyń densaýlyǵy men ómirine tikeleı qater tóngen jaǵdaıda ony ata-anasynan nemese olardyń ornyndaǵy adamdardan alý) balany ata-anasynan (olardyń bireýinen) nemese ony qamqorshylyqqa alǵan adamdardan shuǵyl túrde alý sharalaryn qoldaný – memlekettiń mindetine jatady.

Bul rette, qylmystyq-protsestik zańnama negizinde tergelmeıtin turmystaǵy zorlyq-zombylyqpen baılanysty oqıǵalar boıynsha memlekettiń mindetinen otbasylyq qarym-qatynasty qalpyna keltirýge járdemdesý normasy alynyp tastaldy.