Ázerbaıjan balyq ónimderin Eýropa elderine eksporttamaq
ASTANA. KAZINFORM — Ázerbaıjan otandyq azyq-túlik ónimderin, ásirese Eýropalyq Odaq elderine shyǵarý múmkindigin keńeıtý jáne eksporttyq áleýetti arttyrý maqsatynda retteý jáne baqylaý sharalaryn jalǵastyryp jatyr, dep jazady AZERTADJ.
Azyq-túlik qaýipsizdigi agenttiginiń Aqparattyq qamtamasyz etý jáne ınnovatsııalyq sheshimder bólimi habarlaǵandaı, bul baǵytta birqatar sharalar júzege asyrylyp jatyr. Atap aıtqanda, balyq sharýashylyǵynda ósirilgen bekire tuqymdas balyqtardan alynatyn ýyldyryq ónimderine qatysty jyl saıyn tabysty oryndalyp kele jatqan monıtorıng josparlary bar. Sonyń nátıjesinde atalǵan ónimderdi Eýropa naryǵyna eksporttaýǵa 2025–2026 jyldarǵa ruqsat kúshinde saqtalyp otyr.
Sonymen qatar, agenttik EO naryǵyna balyq ónimderin shyǵarý maqsatynda arnaıy monıtorıng josparyn ázirlep, ony Eýropalyq komıssııanyń Densaýlyq saqtaý jáne azyq-túlik qaýipsizdigi jónindegi Bas dırektoratqa usyndy. Eýropalyq qurylym tarapynan tehnıkalyq baǵalaý júrgizilgennen keıin, Ázerbaıjan balyǵynyń EO naryǵyna eksportyna arnalǵan bul jospar maquldandy.
Aıta keteıik, janýarlardan alynatyn azyq-túlik ónimderin EO elderine eksporttaý úshin eldiń azyq-túlik qaýipsizdigi júıesi, zańnamasy, sondaı-aq baqylaý jáne retteý sharalary eýropalyq talaptarǵa saı bolýy tıis. Bul baǵytta Ázerbaıjan óz mindettemelerin júıeli túrde oryndap keledi jáne halyqaralyq áriptesterimen ózara senimge negizdelgen yntymaqtastyqty jalǵastyrady.
Buǵan deıin janýarlar men qustardyń aýrýlaryna baılanysty Ázerbaıjanda keıbir óńirden ımportqa ýaqytsha shekteýler engizilgeni belgili boldy.