Ázerbaıjan Bakýdegi «Formýla 1» qonaqtary úshin vızalyq rejımdi jeńildetti
ASTANA.KAZINFORM - Ázerbaıjan prezıdenti Ilham Álıev «Formýla-1» Gran-prıine barýdy josparlaǵan sheteldik qonaqtar men jarys qatysýshylary úshin vızalyq rejımdi jeńildetý týraly jarlyqqa qol qoıdy, dep habarlaıdy Kazinform agenttiginiń menshikti tilshisi.
Qujatqa sáıkes, 2025 jyldyń 25 tamyzy men 30 qyrkúıegi aralyǵynda sheteldik azamattar men azamattyǵy joq tulǵalar Ázerbaıjan halyqaralyq áýejaılaryna kelgennen keıin kelesi qujattardy usynyp, vıza ala alady:
- chempıonattyń halyqaralyq uıymdastyrýshylary Formula One Management Limited nemese FIA bergen akkredıtteý kartasy;
- «Baký qalalyq sheńberi» operatsııalyq kompanııasynyń akkredıtteýi;
- konkýrsqa bılet, onyń ishinde elektrondyq bılet nemese ony satyp alýdy rastaıtyn qujat.
Sheteldik qonaqtar kelgennen keıin vızalardan basqa, ASAN Visa elektrondy vıza júıesin paıdalana alady, bul sapardy josparlaý kezinde úlken yńǵaılylyq beredi.
«Formýla 1» Ázerbaıjan Gran-prıine dástúrli túrde álemniń túkpir-túkpirinen myńdaǵan kórermen men qatysýshylar keledi. Jeńildetilgen vızalyq rejım jankúıerlerge, mamandarǵa, BAQ ókilderine jáne sporttyq jarystyń basqa da qonaqtaryna jaılylyq jasaýǵa baǵyttalǵan.
Bıyl jańa maýsymda usynylǵan 24 jarystyń arasynda Baký jarysy toǵyzynshy ret ótkizilmek. Chempıonattyń kelesi kezeńi 19-21 qyrkúıek aralyǵynda Bakýde ótedi. Ázerbaıjan Gran-prıi 2016 jyldan beri ótkizilip keledi jáne qazirdiń ózinde álemdik sport arenasynda eldiń vızıttik kartasyna aınaldy.
Aıta keteıik, ótken jyly Ázerbaıjan Gran-prıiniń jeńimpazy aýstralııalyq McLaren ushqyshy Oskar Pıastrı, ekinshi oryn Ferrari komandasynan Sharl Leklerge, úshinshi oryn Mercedes atynan qatysqan Djordj Rasselge buıyrdy.
Aıta keteıik, Qazaqstannan Ázerbaıjanǵa týrıstik aǵym 20%-ǵa artty.