Ázerbaıjan azamattary kóbine Qazaqstannyń qaı óńirlerinde ýaqytsha turyp jatyr
«Búgingi tańda eki el arasyndaǵy áleýmettik-ekonomıkalyq yntymaqtastyq jyldan jylǵa artyp kele jatyr. Ol týraly kelesi statıstıka málimetterinen baıqaýǵa bolady. Máselen, 2018 jyly Qazaqstanǵa 50 myńǵa jýyq Ázerbaıjan azamaty kelse, 2019 jyly 48 myń azamat kelgen. Kerisinshe Qazaqstannan 2018 jyly 29 myń, 2019 jyly 28 myń azamat Ázerbaıjanǵa barǵan. 2020-2021 jyldary pandemııaǵa baılanysty saparlaıtyn azamattar azaıǵan», - dedi senator.
Onyń aıtýynsha, elimizde Ázerbaıjan azamattarynyń kóbisi Qostanaı, Qaraǵandy, Shyǵys Qazaqstan oblystarynda, Almaty, Nur-Sultan qalalarynda ýaqytsha turýda.
«Osyndaı jaǵdaıda, 2020 jyly Qazaqstan Respýblıkasynda bolý erejesin buzǵan úshin ákimshilik jaýapkershilikke 415 Ázerbaıjan azamaty tartyldy, al 112-si elimizden tys jerge shyǵaryldy. Sáıkesinshe 2021 jyly, dál osy kórsetkishter 148 jáne 14 Ázerbaıjan azamatyn qamtyp otyr. Sondaı-aq búgingi tańda tirkelgen merzim aıaqtalǵannan keıin memleketimizde zańsyz qalyp qalǵan 75 azamat anyqtalyp, ákimshilik jaýapkershilikke tartylyp, olardyń 4-eýi sottyń sheshimimen elden shyǵarylǵan», - dedi Sultanbek Mákejanov.
Budan buryn habarlanǵandaı, búgin Senattyń jalpy otyrysynda «Qazaqstan Respýblıkasynyń Úkimeti men Ázerbaıjan Respýblıkasynyń Úkimeti arasyndaǵy kóshi-qon salasyndaǵy yntymaqtastyq týraly kelisimdi ratıfıkatsııalaý týraly» Zańy qabyldandy.
Kelisimdi ratıfıkatsııalaý kóshi-qon aǵyndaryn retteý, azamattyq máselelerin sheshý jáne zańsyz kóshi-qon jelilerin anyqtaý úshin qolaıly jaǵdaı jasaıdy.
