Ázerbaıjan azamaty Qazaqstandaǵy zańsyz oıyn bıznesin shetelden basqaryp otyrǵan

ALMATY. KAZINFORM — Qazaqstan quqyq qorǵaý organdary zańsyz oıyn bıznesin uıymdastyrǵan qylmystyq toptyń áreketin toqtatty. 

Almaty prokýratýrasynyń habarlaýynsha, top músheleri QR «Oıyn bıznesi týraly» Zańyn óreskel buzyp, lıtsenzııasyz onlaın-kazıno júrgizgen. Olar paıdakúnemdik maqsatpen azamattardy qumar oıyndaryna tartyp, zańsyz tabys tapqan. 

Tergeý málimetinshe, qylmystyq shemanyń negizgi uıymdastyrýshylarynyń biri – Ázerbaıjan azamaty. Ol Qazaqstan aýmaǵynan tys jerde otyryp, onlaın-kazınonyń tehnıkalyq jumysyn, qarjylyq operatsııalaryn jáne qylmystyq jolmen alynǵan qarajattyń qozǵalysyn tolyq baqylap, úılestirip otyrǵan.

Shetel azamatyna qatysty is materıaldary ony qylmystyq jaýapkershilikke tartý úshin Ázerbaıjanǵa joldandy.

— Qylmystyq toptyń basqa múshesine qatysty sotqa deıingi tergep-tekserý aıaqtalyp, is sotqa joldandy. Sot sheshimimen ol bas bostandyǵynan aıyrý jazasyna kesildi, - delingen habarlamada.

Vedomstvo Qazaqstan Respýblıkasynyń zańyn buzǵan aıyptalýshylar el ishinde de, shet memleketterde de ornalasqanyna qaramastan, jaýapkershilikten jaltaryp kete almaıtynyn atap ótti. 

Eske salaıyq, munyń aldynda 600 mlrd teńgelik zańsyz qumar oıyn shemasy boıynsha 9 adam qamaýǵa alynǵanyn habarlaǵan edik.