Ázerbaıjan aýmaǵyna Irannyń ushý apparaty qulady
ASTANA.KAZINFORM - Ázerbaıjannyń Nahchyvan avtonomııalyq respýblıkasynda pılotsyz ushý apparattary (PUA) apatqa ushyrady. Aldyn ala málimet boıynsha, olar Iran qarýly kúshterine tıesili, dep habarlaıdy Kazinform agenttiginiń Bakýdegi tilshisi.
BAQ habarlamalaryna sáıkes, oqıǵa Nahchyvan halyqaralyq áýejaıy men oǵan jaqyn ornalasqan aýyldardyń mańynda bolǵan. Drondardyń biri Nahchyvan halyqaralyq áýejaıynyń termınal ǵımaratyna, al ekinshisi Shekerabad aýylyndaǵy mekteptiń mańyna qulaǵan.
Oqıǵa saldarynan eki beıbit turǵyn jaraqat aldy. Qutqarý qyzmetteri men órt sóndirýshiler oqıǵa ornyna dereý jetti, zalaldy baǵalaý jáne tazalaý jumystary júrgizilip jatyr.
Oqıǵaǵa jaýap retinde Ázerbaıjan Syrtqy ister mınıstrligi dron shabýylyn qatań aıyptaıtyn resmı málimdeme jasady.
- Biz Iran aýmaǵynan jasalǵan, áýejaı ǵımaratyna zaqym keltirgen jáne eki beıbit turǵynnyń jaraqat alǵan bul dron shabýyldaryn qatań aıyptaımyz. Ázerbaıjan aýmaǵyna jasalǵan bul shabýyl halyqaralyq quqyq normalary men qaǵıdattaryna qaıshy keledi jáne aımaqtaǵy shıelenisti ýshyqtyrady, - delingen Syrtqy ister mınıstrliginiń málimdemesinde.
Ázerbaıjan Syrtqy ister mınıstrligi Baký Iran tarapynan oqıǵany tez arada anyqtaýdy, tıisti túsinikteme berýdi jáne bolashaqta mundaı oqıǵalardyń qaıtalanýyna jol bermeý úshin dereý sharalar qabyldaýdy talap etetinin atap ótti.
Ázerbaıjan sonymen qatar tıisti jaýap sharalaryn qabyldaý quqyǵyn ózinde qaldyratynyn málimdedi.
Dıplomatııalyq jaýap retinde Irannyń Ázerbaıjandaǵy Tótenshe jáne ókiletti elshisi Modjtaba Demırchılý Syrtqy ister mınıstrligine shaqyrylyp, onda narazylyq bildirilip, oǵan tıisti nota tapsyryldy.
Birqatar Ázerbaıjan BAQ-tarynyń habarlaýynsha, shabýyl bastapqyda boljanǵandaı «Shahed» serııaly drondarmen emes, aıtarlyqtaı qashyqtyqqa ushatyn «Arash-2» shabýyldaýshy ushaqtarymen jasalǵan bolýy múmkin.
Oqıǵa aımaqtaǵy jalpy shıelenis pen Taıaý Shyǵystaǵy shıelenisýdiń jalǵasýy aıasynda boldy. Ázerbaıjan bıligi jaǵdaıdyń baqylaýda ekenin jáne oqıǵanyń barlyq mán-jaıyn tıisti organdar muqııat tekserip jatqanyn atap ótti.
Buǵan deıin Iran prezıdentiniń dostas jáne kórshiles elderge úndeý jasaǵanyn habarlaǵan edik.