Ázerbaıjan astanasynda sońǵy 9 jylda bolmaǵan aıaz túsedi

BAKÝ. QazAqparat. – Qalyń qar Ázerbaıjan turǵyndarynyń qozǵalysyn qıyndatyp jiberdi, dep habarlaıdy QazAqparat.

Bakýdyń keıbir joldarynda qalyń qar men aıazǵa baılanysty kólik quraldarynyń qozǵalysy qıyndady.

Qalanyń negizgi joldarynda uzyn-sonar keptelister paıda bolsa, temirjol baılanystary aıtarlyqtaı keshigip jatyr. Mektepter men mektepke deıingi mekemelerde sabaqtar toqtatyldy. Sondaı-aq qatty kóktaıǵaqtyń saldarynan kóptegen apat oryn aldy.

Qazirgi ýaqytta kóktaıǵaq saldarynan túrli jaraqat alǵan 12 adam Bakýdyń jedel járdemimen aýrýhanaǵa jetkizildi.

Aýa raıynyń qolaısyzdyǵyna baılanysty Baký polıtsııasy joldardaǵy jazataıym oqıǵalardy boldyrmas úshin júrgizýshilerdi jeke avtokólikten ýaqytsha bas tartýǵa shaqyrdy. Sonymen qatar Baký qalasynyń bıligi qalyń qardyń saldaryn joıý boıynsha qabyldanyp jatqan sharalar týraly habarlady.

«Bakýde 12 saǵat boıy toqtamaı qar jaýýda. Jaýǵan qardyń deńgeıi – 18 mm. Bul aılyq normanyń 90%-yn quraıdy. Qalanyń kommýnaldyq qurylymdary túnnen bastap joldardy qardan tazartýǵa kiristi. Tehnıkanyń kómegimen joldarǵa tuz jáne arnaıy hımııalyq zattar sebiledi. Bul jumys keste boıynsha kúni boıy jalǵasady», – dedi Baký qalasynyń atqarýshy bılik vedomstvosynda.

Ázerbaıjan ekologııa jáne tabıǵı resýrstar mınıstrliginiń Ulttyq gıdrometeorologııalyq ortalyǵynyń dırektory Ýmaıra Tagıevanyń aıtýynsha, qazirgi ýaqytta Bakýde 5 gradýs aıaz, eldiń taýly aımaqtarynda 15 gradýs aıaz tirkelgen, qardyń kóp bóligi Ázerbaıjannyń soltústik aımaǵynda túsken.

«Qazir bul protsestiń shyńy baıqalady, al keshke qaraı qardyń qarqyndylyǵy tómendeıdi. Eger ótken túnde aýa temperatýrasy 4,8 gradýs aıaz bolsa, osy túnde 8-9 gradýs aıaz bolady», – dep atap ótti Ý.Tagıeva.

Gıdrometeorologııalyq qyzmettiń basshysy 2012 jyldyń qysynda temperatýra 11 gradýs aıazǵa deıin tómendep, 1969 jylǵy rekordty jańartqanyn eske saldy. 2012 jyly 14 kún sýyq bolyp, aýa temperatýrasy 0 gradýsty kórsetken.

Sonymen birge, Ázerbaıjannyń ulttyq gıdrometeorologııa qyzmeti 25 aqpanda tańerteń Baký men Absheron túbeginde qar birtindep saıabyrsıdy dep habarlady. Kúndiz Ońtústik jelge aýysatyn soltústik-batystan jel soǵady. Eldiń aımaqtarynda qar saıabyrsıdy, kúndiz ashyq bolady. Túnde jáne tańerteń joldarda kóktaıǵaq kútilýde.

Avtory: Serikbol Qoshmaǵanbetov