Ázerbaıjan astanasy «Formýla-1» Gran-prıine daıyndalyp jatyr
ASTANA. KAZINFORM — Ázerbaıjan Gran-prıi qarsańynda Bakýdegi jarys joly kólik pen jaıaý júrginshiler úshin jabylyp, jarysqa qatysty daıyndyq tolyq aıaqtaldy, dep habarlaıdy Kazinform agenttiginiń óńirdegi menshikti tilshisi.
Birneshe kúnnen soń «Formýla-1» júırikteri júıtkip ótetin Baký kósheleri jarys dodasyna saı jańa keıipke endi.
Kúndelikti kólik qozǵalysy ótetin Baký kósheleriniń bir bóligi búginde tolyqqandy jarys jolyna aınaldy. Jol boıyna qorǵanys bógetteri ornatylyp, kórermenge arnalǵan trıbýnalar qoıyldy. Qaýipsizdik sharalary kúsheıtilip, jol jabyny jarysqa tolyq ázirlendi.
Jarysqa aıryqsha sán beretin taǵy bir erekshelik — qalanyń tarıhı bóligin boılaı ótetin trassasy. Bolıdter Azadlyg pen Azneft alańdarynyń janynan zýlap, ǵasyrlar qoınaýynan jetken Qyz munarasy men Icherısheherdiń kóne qamal qaqpalarynyń tusynan ótedi. Zamanaýı avtosporttyń alapat ekpini men kóne qalanyń aıbyndy sáýleti toǵysqan bul kórinis Baký jarysyna qaıtalanbas sıpat darytady.
Kaspıı teńizinen — Icherısheherdiń kóne qamaldaryna deıin
Gran-prı jarysy Azadlyg alańynan bastalady. Sóre syzyǵynan shyqqan bolıdter aldymen teńiz jaǵalaýyndaǵy tasjolǵa bet alyp, odan ári qalanyń tarıhı ortalyǵyna enedi. Munda olardy Icherısheherdiń tar ári tehnıkalyq turǵydan kúrdeli kósheleri kútip tur.
Baký avtodromy — «Formýla-1» kúntizbesindegi ózgeshe trassalardyń biri. Munda bolıdter uzyn ári jyldam túzý bólikterden syrǵyp ótip, tarıhı qalanyń kúrdeli burylystaryna enedi. Zamanaýı jarys tehnıkasy men ǵasyrlar boıy saqtalǵan sáýlettiń osylaısha qatar toǵysýy Ázerbaıjan kezeńine ózindik sıpat beredi.
Bıylǵy doda kúntizbedegi ózindik formatymen erekshelenip otyr.
Gran-prı tarıhta alǵash ret senbi kúni ótedi.
Negizgi jarys 26 qyrkúıekke josparlanǵan, ıaǵnı bastapqy mejelengen kúnnen bir kún erte ótedi. Buǵan 27 qyrkúıekte Ázerbaıjanda atap ótiletin Áskerı qyzmetshilerdi eske alý kúni sebep boldy.
Demalys kúnderindegi jarys baǵdarlamasy tómendegideı:
- 24 qyrkúıek — erkin jattyǵýlar;
- 25 qyrkúıek — irikteý;
- 26 qyrkúıek — Ázerbaıjan Gran-prıi.
Jarysqa qatysýshylar 20 burylysty qamtıtyn, uzyndyǵy 6 shaqyrymǵa jýyq trassada 51 aınalym jasaýy kerek.
Ázerbaıjan úshin aldaǵy Gran-prı «Formýla-1» kezeńiniń Bakýde onynshy ret ótýimen erekshelenedi. Búginde bul jarys halyqaralyq avtosport kúntizbesinen turaqty oryn aldy, al qalalyq trassa eldegi aıtýly jarystyń ózindik sımvolyna aınaldy.
Jankúıerler úshin mazmundy baǵdarlama ázirlendi
Ázerbaıjan Gran-prıi aıasynda Baký gúlzarynda Fan-aımaq jumys isteıdi. Jankúıerler úshin F1 jarys sımýlıatory, pıt-stop boıynsha saıys, Ninja Challenge, zıplaın, ınteraktıvti jáne sporttyq is-sharalar uıymdastyrylady. Balalar úshin shaǵyn elektromobıldermen jarys, akvagrım, sheberlik sabaqtary men túrli oıyn-saýyq baǵdarlamalary qarastyrylǵan.
Baǵdarlama qonaqtarǵa jarys júrgizýshileri men komanda múshelerimen júzdesýge, ártisterdiń ónerin tamashalaýǵa jáne túrli shoý-baǵdarlamalardy kórýge múmkindik beredi.
Mýzykalyq baǵdarlama Crystal Hall sahnasynda jalǵasady. 24 qyrkúıekte Kelvın Harrıs, al 25 qyrkúıekte Ketı Perrı óner kórsetedi.
Buǵan deıin «Formýla-1» Bahreın Gran-prıin Malaızııaǵa aýystyrǵany habarlanǵan bolatyn.
Sondaı-aq Túrkııanyń alty jyldyq úzilisten keıin «Formýla-1» kúntizbesine qaıta oralatyny týraly jazǵan edik.
