Ázerbaıjan-armıan shekarasynda atys bolyp, 5 adam zardap shekti

BAKÝ. QazAqparat – Ázerbaıjan men Armenııa shekarasynda taǵy da qarýly qaqtyǵys bolyp, 5 adam zardap shekti. Taraptar bir-birin atysty toqtatý tártibin buzdy jáne shekaradaǵy jaǵdaıdy ádeıi ýshyqtyrdy dep aıyptap otyr, dep habarlaıdy QazAqparattyń menshikti tilshisi eki eldiń qorǵanys mekemelerine silteme jasap.

Ázerbaıjan Qorǵanys mınıstrliginiń málimeti boıynsha, 10 mamyr kúni keshke Armenııa qarýly kúshteriniń bólimshesi Basargechar aýdany Zod aýyly jaǵynan Ázerbaıjan áskerine túrli qarýdan oq jaýdyrǵan.

«Qarsy taraptyń kózdep oq atýy saldarynan Ázerbaıjan armııasynda merziminen tys qyzmet etip júrgen áskerı qyzmetker Mahmýdlý Mýslım Vıdadı oglý basynan aýyr jaraqat aldy», - delingen málimdemede.

Jaralanǵan áskerı qyzmetker shuǵyl áskerı-medıtsına mekemesine jetkizilgeni habarlandy. Kelbadjar áskerı prokýratýrasy Ázerbaıjan ÁK áskerı qyzmetkeriniń jaralanýyna baılanysty qylmystyq is qozǵady.

Ázerbaıjan tarapynyń aıtýynsha, Armenııa ÁK Ázerbaıjanǵa iri kalıbrli qarý men mınometten oq atady.

Al Armenııa Qorǵanys mınıstrligi «11 mamyr, 06:00-den bastap Ázerbaıjan ÁK bólimshesi Sotk (Zod) baǵytynda ornalasqan armıan bekinisterine zeńbirekten jáne mınometten oq atyldy» dep sendirip otyr.

07:00-degi derek boıynsha, Armenııa jaqtan tórt adam jaralandy. Armenııa Qorǵanys mınıstrliginiń 07.50-degi aqparaty boıynsha shekaradaǵy atys jalǵasyp jatyr.

Ázerbaıjan ÁK «Bayraktar» ushý apparattaryn paıdalanǵany aıtylyp jatyr.

Qorǵanys mekemesi armıan jaqtan 10:25-tegi aqparat boıynsha 4 adam jaraqat alǵanyn habarlady.

«Jaralanǵan 2 áskerı qyzmetkerdiń jaǵdaıy qanaǵattanarlyq bolsa, ekeýiniki – ortasha aýyr. Qazirgi ýaqytta jaralanǵan qyzmetkerlerdiń ómirine qaýip tónip turǵan joq», - delingen habarlamada.

Qazir Armenııa Qorǵanys mınıstrligi armıan-ázerbaıjan shekarasyndaǵy shıelenis azaıǵanyn málimdedi. Al Ázerbaıjan tarapynyń aıtýynsha, Armenııa qarýly kúshteri shekaraǵa qosymsha kúsh, jeke quram men tehnıkany ákelip jatyr.

Buǵan deıin 11 sáýirde eki eldiń túıisken jerinde qatań urys bolyp, eki jaqtan 7 áskerı qyzmetker mert boldy. Taraptar bir-birin arandatty dep aıyptady.