Ázerbaıjan Armenııanyń 32 áskerı qyzmetshisin bostandyqqa jiberedi
Armenııa Respýblıkasy premer-mınıstriniń apparaty jáne Ázerbaıjan Respýblıkasy prezıdentiniń ákimshiligi birlesken málimdeme jasady. Kazinform bul týraly Armenpress-ke silteme jasap habarlaıdy.
«Ázerbaıjan Respýblıkasy jáne Armenııa Respýblıkasy óńirde kópten kútken beıbitshilikti ornatý úshin tarıhı múmkindik týyndaǵany jónindegi pikirge ortaq. Qos memleket te qarym-qatynasty túzetý, sýverenıtet jáne terrıtorııalyq bútindik prıntsıpine qurmet negizinde beıbit kelisimge qol jetkizý nıetin kezekti márte qýattaıdy», – delingen málimdemede.
Kelissózder nátıjesinde eki el arasyndaǵy senimdi nyǵaıtý boıynsha eleýli qadamdar qolǵa alý týraly kelisimge qol jetkizilgen.
Atap aıtqanda:
- Ázerbaıjan 32 armıan áskerı qyzmetshisin bosatady;
- Armenııa ázerbaıjandyq 2 áskerı qyzmetshini bosatady;
- Armenııa klımattyń ózgerýi jónindegi BUU-nyń Negizdemelik konventsııasyna qatysýshy taraptar konferentsııasynyń (SOR-29) 29-sessııasyn ótkizýge Ázerbaıjan bergen ótinimge qoldaý bildirip, sessııany ótkizýge óz kandıdatýrasyn usynýdan bas tartady.
Málim etilgendeı, Armenııa jáne Ázerbaıjan Respýblıkalary senimdi nyǵaıtýǵa baǵyttalǵan jáne aldaǵy taıaý keleshekte iske asyrý kózdelgen is-sharalardyń aýqymdy kólemi boıynsha kelissózderdi jalǵastyrýda jáne halyqaralyq qaýymdastyqty bul nıetke qoldaý bildirýge shaqyrdy.
