Ázerbaıjan Armenııamen beıbit kelisimge qol qoıý úshin negizgi sharttaryn atady
ASTANA. KAZINFORM – Ázerbaıjan Prezıdenti Ilham Álıev Armenııamen túpkilikti beıbit kelisimge qol qoıý múmkindigine jol ashatyn basty sharttardy jarııa etti. Bul týraly Kazinform agenttiginiń tilshisi Ázerbaıjan Prezıdentiniń resmı saıtyna silteme jasap habarlady.
Memleket basshysynyń aıtýynsha, beıbit úderisti Ázerbaıjan ózi bastap qana qoımaı, kelisimniń alǵashqy jobasyn da ázirlegen. Bul joba 8 tamyzda Vashıngtonda parafırlengen qujattyń negizine aınalǵan.
— Biz kelissózderdi bastaýǵa usynys jasap, beıbit kelisimniń alǵashqy jobasyn ázirledik. Aq úıde parafırlengen qujat — memleketter arasyndaǵy qarym-qatynasty retteý jónindegi Ázerbaıjan kózqarasynyń kórinisi, – dedi Ilham Álıev.
Alaıda, prezıdenttiń aıtýynsha, kelisimge tolyq qol qoıý áli de múmkin emes, sebebi Armenııa Konstıtýtsııasynda Ázerbaıjannyń aýmaqtyq tutastyǵyna kúmán keltiretin bap bar.
Ázerbaıjannyń basty sharty — Armenııa Konstıtýtsııasyna ózgerister engizý. ıAǵnı, Ázerbaıjanǵa aýmaqtyq talap qoıýdy joqqa shyǵaratyn konstıtýtsııalyq reforma qajet. Bul ózgerister engizilgennen keıin ǵana resmı Baký túpkilikti beıbit kelisimge qol qoıýǵa daıyn bolady.
– Biz Armenııadan tıisti túzetýler engizýdi kútemiz. Bul kelissóz úderisiniń aıaqtalǵanyn jáne óńirde jańa dáýirdiń bastalǵanyn bildiretin belgi bolady, – dep málimdedi Álıev.
Prezıdent sondaı-aq, qujattyń AQSh-tyń burynǵy prezıdenti Donald Tramptyń qatysýymen parafırlenýi – 30 jyldan astam ýaqyt úzilispen jalǵasqan qaqtyǵystyń aıaqtalǵanynyń sımvoly ekenin atap ótti.
Onyń sózinshe, beıbit kelisimniń júzege asyrylýy Ońtústik Kavkaz ǵana emes, Ortalyq Azııa men Taıaý Shyǵys aımaqtaryna da jańa múmkindikter ashady.
Buǵan deıin Armenııa Premer-mınıstri beıbit kelisim úshin Konstıtýtsııaǵa ózgeris engizýge daıyn ekenin málimdegen bolatyn.
Aıta keteıik, 8 tamyzda Ázerbaıjan Prezıdenti, Armenııa Premer-mınıstri jáne AQSh Prezıdenti Vashıngtonda Baký men Erevan arasyndaǵy qatynastardy beıbit jolmen retteý týraly birlesken deklaratsııaǵa qol qoıǵan.