Ázerbaıjan Armenııaǵa halyqaralyq ınternet-trafık tranzıtin qamtamasyz etedi
ASTANA. KAZINFORM — Ázerbaıjan Armenııa baǵyty boıynsha halyqaralyq ınternet-trafıkke arnalǵan jańa tranzıttik baǵytty óz telekommýnıkatsııalyq jelisi arqyly qamtamasyz etedi. Bul týraly Kazinform agenttiginiń Bakýdegi menshikti tilshisi habarlady.
Belgili bolǵandaı, tıisti kelisim ázerbaıjandyq AzerTelecom operatory men armenııalyq Telecom Armenia kompanııasy arasynda jasalǵan.
Qol jetkizilgen ýaǵdalastyq aıasynda Ázerbaıjan tarapy óz ınfraqurylymyn paıdalana otyryp, ınternet-trafık tranzıtin qamtamasyz etedi.
Kelisim óńirlik baılanys baǵyttaryn ártaraptandyrýǵa, telekommýnıkatsııalyq jelilerdiń turaqtylyǵyn arttyrýǵa jáne Ońtústik Kavkazdaǵy tsıfrlyq baılanys salasyndaǵy yntymaqtastyqty damytýǵa baǵyttalǵan.
Qol jetkizilgen ýaǵdalastyq 2025 jylǵy tamyzda eki el qol qoıǵan birlesken deklaratsııadan keıingi ózara yqpaldastyqty keńeıtý jolyndaǵy naqty qadam retinde baǵalanyp otyr. Atalǵan qujat ekijaqty yntymaqtastyqty damytý men qarym-qatynasty birtindep qalypqa keltirýdi kózdeıdi.
Buǵan deıin Nıkol Pashınıan Ázerbaıjanmen aradaǵy ilgerileýge oń baǵa bergen edi.
Qańtar aıynda Ázerbaıjan Armenııaǵa munaı ónimderiniń kezekti partııasyn jóneltken.
Osyǵan deıin Pashınıan Ázerbaıjanmen ilgerileýdi tarıhı kezeń dep ataǵan bolatyn.
