Ázerbaıjan Armenııaǵa birneshe sottalǵan azamatty tapsyrdy

ASTANA. KAZINFORM — Ázerbaıjan men Armenııa arasyndaǵy ekijaqty kelisim jáne gýmanızm prıntsıpterine sáıkes, tórt armıan azamaty Armenııaǵa berildi dep habarlaıdy armıan BAQ-tary. Bul týraly Anadoly habarlady.

Vagıf Cherkezı Hachatrıan, Gevorg Rýbenovıch Sýdjıan, Davıd Tıgranı Davtıan jáne Vıken Abraham Eýldjekdjııan ártúrli baptar boıynsha Ázerbaıjan QK-inde aıypty dep tanylyp, el aýmaǵynda jazasyn ótep kelgen.

Bul protsess sonymen qatar eki el arasyndaǵy beıbitshiliktiń praktıkalyq nátıjesi retinde qarastyrylady.

Sottalǵan azamattardyń quqyqtary Ázerbaıjandaǵy tutqyn kezinde tolyq saqtalǵan, olardyń densaýlyǵy men turý jaǵdaıy halyqaralyq standarttarǵa saı bolǵan. Armenııaǵa jiberilgenge deıin olar medıtsınalyq tekserýden ótken jáne densaýlyǵynyń qalypty ekeni rastalǵan.

Buǵan deıin Armenııa premer-mınıstri Nıkol Pashınıan Gevorg Sýdjıan, Davıd Davtıan, Vıgen Eýldjekdjııan jáne Vagıf Hachatrıan Armenııaǵa tapsyrylǵanyn habarlaǵan. Olar Hakarı kópiri arqyly jetkizilip, Armenııa aýmaǵyna kelgen.

Vagıf Hachatrıan Hodjaly aýdany Meshalı aýylynda bolǵan qyrǵynǵa qatysy úshin 15 jylǵa sottalǵan, ótken jeltoqsanda aýyr jaǵdaıda aýrýhanaǵa jatqyzylǵany habarlanǵan.

Davıd Davtıan men Gevorg Sýdjıan 2021 jyly 28 shildede Bakýdaǵy sot sheshimimen 15 jylǵa sottalǵan. Jaza merzimi aıaqtalǵan soń olar Ázerbaıjannan shyǵarý josparlanǵan. Aıyptaý boıynsha, olar aldyn ala sóz baılasqan túrde Ázerbaıjan shekarasyn zańsyz kesip ótip, áskerı aqparat jınap, ony Armenııa arnaıy qyzmetine tapsyrǵan.

Vıgen Eýldjekdjııan 2020 jyly Ázerbaıjan UQK-da ashylǵan qylmystyq is boıynsha birneshe baptar (jalaqy úshin qarýly qyzmet, terrorızm, zańsyz qarý aınalymy, zańsyz qarýly qurylym qurý jáne memlekettik shekarany zańsyz kesip ótý) boıynsha sottalyp, Baký áskerı sotynyń sheshimimen 20 jylǵa bas bostandyǵynan aıyrylǵan.

Budan buryn Germanııada 13 jyl qamaýda otyrǵan azamatqa 1,31 mln eýro ótemaqy tólenetini aıtyldy.