Ázerbaıjan, Armenııa jáne AQSh beıbitshilik kelisimin oryndaý mindettemesin rastady
ASTANA.KAZINFORM - Ázerbaıjan, Armenııa jáne AQSh AQSh prezıdenti Donald Tramp, Ázerbaıjan prezıdenti Ilham Álıev jáne Armenııa premer-mınıstri Nıkol Pashınıannyń qatysýymen Aq úıdegi beıbitshilik sammıtiniń bir jyldyǵyna oraı birlesken málimdeme jasady, dep habarlaıdy Kazinform agenttiginiń Bakýdegi tilshisi.
Málimdemede sońǵy bir jyl ishinde taraptar Beıbitshilik týraly birlesken deklaratsııany oryndaý úshin birqatar qadam jasaǵany aıtyldy. Atap aıtqanda, Ázerbaıjan-Armenııa shekarasyndaǵy turaqtylyq saqtaldy, qarym-qatynasty qalypqa keltirý, shekaralardy delımıtatsııalaý jáne senimdi nyǵaıtý protsesteri jalǵasyp jatyr.
Negizgi baǵyttardyń biri retinde - «Tramptyń halyqaralyq beıbitshilik pen órkendeý joly» (TRIPP) ataldy. Málimdemege sáıkes, joba is júzinde oryndala bastady. Armenııada ınjenerlik zertteý jumystary bastalyp, AQSh pen Armenııa arasynda baǵytty damytý úshin kompanııa qurý týraly kelisimge qol jetkizildi, al Ázerbaıjan TRIPP ınfraqurylymymen baılanysý úshin óz aýmaǵynda avtomobıl joldary men temirjoldar qurylysyn aıaqtady.
Málimdemede sondaı-aq AQSh-tyń Transkaspıı saýda baǵytyn damytýǵa qosqan úlesi atalyp ótti.
AQSh Ońtústik Kavkaz ben Ortalyq Azııadaǵy Orta dálizdi damytýǵa jeke ınvestıtsııalardy tartý úshin Transkaspıı kásipkerlik qoryna 201 mıllıon dollar bóldi.
Qujatta Ázerbaıjan men Armenııa arasyndaǵy ekonomıkalyq baılanystardy damytý qadamy da sóz boldy. Ázerbaıjan Armenııaǵa qatysty tranzıttik shekteýlerdi alyp tastady, sodan keıin bir jyl ishinde onyń aýmaǵy arqyly Armenııaǵa jáne odan shamamen 60 000 tonna júk tasymaldandy. Ázerbaıjan sonymen qatar Armenııaǵa 20 000 tonna munaı ónimderin jetkizdi.
Eki eldiń telekommýnıkatsııa operatorlary aımaqtyq telekommýnıkatsııa ınfraqurylymynyń turaqtylyǵyn arttyrýǵa baǵyttalǵan ınternet baılanysy týraly kelisimge qol qoıdy.
AQSh, Ázerbaıjan jáne Armenııa eki eldiń de halyqaralyq deńgeıde tanylǵan shekarasy sheńberindegi egemendigi men aýmaqtyq tutastyǵyn qoldaıtyndyǵyn jáne 8 tamyzdaǵy birlesken deklaratsııany tolyq oryndaý mindettemesin rastady.
Buǵan deıin Armenııadaǵy TRIPP jobasy Konstıtýtsııalyq sottyń qaraýynan ótetini habarlanǵan bolatyn.
Esterińizge sala keteıik, 2025 jyldyń 8 tamyzynda Vashıngtonda ótken úshjaqty kezdesýden keıin Ázerbaıjan, Armenııa jáne AQSh kóshbasshylary Baký men Erevan arasyndaǵy beıbit kelisim týraly birlesken deklaratsııa qabyldaǵan bolatyn.
