Ázerbaıjan Aqtaý mańynda ushaq apatynan qaza tapqandardy aza tutty
ASTANA.KAZINFORM - Ázerbaıjanda Aqtaý qalasyna jaqyn jerde 38 adamnyń ómirin qıǵan jolaýshylar ushaǵy apatqa ushyraýyna baılanysty ulttyq aza tutý kúni jarııalandy.
Ázerbaıjan prezıdenti Ilham Álıevtiń buıryǵyna sáıkes bir kún buryn qaza tapqandar úshin aza tutý jarııalandy.
- Ázerbaıjan Respýblıkasy Konstıtýtsııasynyń 109-babynyń 32-tarmaǵyn basshylyqqa ala otyryp, ushaq apatynan qaza tapqandardyń otbasylarynyń qaıǵysyna ortaqtasyp, qaýly etemin: Ázerbaıjan Respýblıkasynyń aýmaǵynda 2024 jylǵy 26 jeltoqsanda aza tutý jarııalansyn, - delingen qujatta.
Osyǵan baılanysty respýblıkada teatr, kontsert jáne sport mekemelerinde 26 jeltoqsanǵa josparlanǵan barlyq mádenı jáne sporttyq sharalar keıinge shegerildi.
Sonymen qatar, eldegi qaıǵynyń belgisi retinde memlekettik týlar túsirilip, teledıdardaǵy oıyn-saýyq baǵdarlamalary toqtatyldy, Baký ortalyǵynda ornatylǵan shyrshalardyń shamdary sóndirildi. Biraq Ázerbaıjannyń oqý oryndarynda bilim berý ádettegideı jalǵasady.
Bakýdegi Qazaqstan elshiliginiń týy da tómen túsirildi.
Kavkaz musylmandary basqarmasy (QMDB) áýe apatynda qaza tapqandardy eske alý úshin el meshitterinde namaz oqylatynyn habarlady.
Ázerbaıjan áýe joldary (AZAL) Baký-Groznyı reısin oryndaǵan Embraer 190 ushaǵynyń Aqtaýda apatqa ushyraý sebepterin tergeý aıaqtalǵansha Bakýden Groznyı men Mahachkalaǵa reısterdi toqtatqanyn habarlady.
Sársenbi, jeltoqsannyń 25-i kúni Bakýden Groznyıǵa bet alǵan Ázerbaıjan áýe joldarynyń ushaǵy Aqtaý mańynda apatqa ushyrady. Bortta 67 adam bolǵan, onyń 29-y aýrýhanaǵa jatqyzyldy.
Qasym-Jomart Toqaev Ázerbaıjan prezıdenti Ilham Álıevke kóńil aıtý jedelhatyn joldady.
Buǵan deıin Reseıge ushyp ketken Ázerbaıjan prezıdenti Ilham Álıev ushaq apatyna baılanysty Bakýge oraldy.
Ol qaza bolǵandardyń otbasylaryna kóńil aıtty. Ázerbaıjannyń birinshi vıtse-prezıdenti Mehrıban Álıeva, Sheshenstan Respýblıkasynyń basshysy Ramzan Kadyrov, Qyrǵyz Respýblıkasynyń prezıdenti Sadyr Japarov ta kóńil aıtty.
Ázerbaıjandyq jýrnalıster qazaqstandyq qutqarýshylarǵa Aqtaý mańynda Ázerbaıjannyń jolaýshylar ushaǵy apatynyń saldaryn joıýdaǵy eńbegi úshin alǵys aıtty.