Azerbaijan Airlines ushaǵynyń apatyn tekserýdiń ekinshi kezeńi atqarylyp jatyr - mınıstr
ASTANA. KAZINFORM – QR Kólik mınıstri Marat Qarabaev Aqtaý qalasy mańynda Azerbaijan Airlines ushaǵynyń apatqa ushyraýy isi boıynsha tekserý qaı kezeńde júrip jatqanyn aıtty.
- Qazaqstan tergeý amaldaryn júrgizetin el retinde bekitilgen. Kez kelgen tergeý birneshe kezeńge bólinedi. Birinshi kezeń - tıisti materıaldardy jınaý, ıaǵnı osy kezeń aıaqtaldy. Endi ekinshi kezeń jalǵasyp jatyr. Bul turǵyda jınaqtalǵan materıaldardy zertteý is-sharalary atqarylyp otyr. Onyń aıasynda bizdiń mamandar jumyldyrylǵan sheteldik mamandarmen, sonyń ishinde IKAO ókilderimen birge Baký men Groznyıda, Rostovta boldy, - dedi M.Qarabaev Senatta joldardyń máselesin talqylaýǵa arnalǵan Úkimet saǵatynan keıin tilshiler suraǵyna jaýap bere otyryp.
Eske salsaq, byltyr 25 jeltoqsanda Aqtaý mańynda, Bakýden Groznyıǵa baǵyt alǵan AZAL jolaýshylar ushaǵy apatqa ushyraǵan bolatyn. Bortta 67 adam, onyń ishinde bes ekıpaj múshesi bolǵan. Apat saldarynan 38 jolaýshy qaza taýyp, 29 adam aman qaldy.
Bıyl qańtar aıynda Ázerbaıjannyń bas prokýrory Kamran Álıev Aqtaý mańynda Ázerbaıjan áýe kompanııasy ushaǵynyń apatqa ushyraýyna qatysty Qazaqstan men Reseıdiń tıisti qurylymdary — prokýratýra jáne quqyq qorǵaý organdarymen birlesip tergeý júrgizip jatqanyn málimdedi.