«Azbýka jılıanyń» úleskerleri óz problemasyn sheshýdiń jolyn tapty - Astana prokýratýrasy
ASTANA. QazAqparat - Búginde úleskerler "Expo Town" turǵyn úı kesheniniń ataýyn "Venskıı kvartalǵa" aýystyryp, ınvestordyń kómegimen nysannyń eki blogyn aıaqtaýǵa jaqyndap qaldy, dep xabarlaıdy QazAqparat tilshisi.
"Byltyr biz "Expo Town" boıynsha jumys istedik. Bárińiz de jaqsy bilesizder, atalǵan nysan "Azbýka jılıa" kompanııalar tobyna kirgen. Byltyr tamyz aıynda sot sheshimine sáıkes, "Expo Town" turǵyn úı-qurylys kooperatıvtiń (úleskerler toby - avt.) atyna aýdaryldy. Bastapqyda ol jerde qaǵylǵan baǵanalardan basqa eshteńe bolmady. Búginde birinshi eki bloktyń qurylysy aıaqtalýǵa jaqyn. Shyny kerek, alǵashqyda adamdar ne isterin bilmedi. Alaıda máseleni sheshýdiń jolyn tapty. Olar jobany ózgertti. Birinshi jobada 892 páter bolsa, qazir páterlerdiń sanyn 1395-ke deıin jetkizdi. Sóıtip, taǵy birneshe qabatty qosý arqyly qosymsha qarjyny tartty", - dedi Astana qalasy prokýratýrasynyń qyzmetkeri Temirlan Ádilxanov búgin Astanada ótken problemalyq turǵyn úılerdiń jármeńkesinde.
Onyń aıtýynsha, osy ispetti mysaldar problemalyq turǵyn úıler máselesin sheshýge bolatynyn kórsetip otyr. Sondyqtan ınvestorlar esh qoryqpaı, óz qarjysyn sala alady. "Ashyǵyn aıtý kerek, "Expo Town" turǵyn úıin salý jumystary osylaı sheshiledi dep eshkim oılamaǵan. Olarda tórt qabatty úıler boldy. Qazir besinshi jáne altynshy qabatty qosyp, taǵy 500-den astam jańa páterdi salaıyn dep jatyr. Sonyń arqasynda ınvestor úleskerlerdiń urlanǵan aqshasyn ótep otyr", - dep atap kórsetti prokýror QazAqparat tilshisine bergen suxbatynda.
