«Azbýka jılıa» qurylys kompanııalary tobynyń basshysy E.Taıjanov Avstrııada jasyrynyp júr - Prokýratýra
ASTANA. QazAqparat - «Azbýka jılıa» qurylys kompanııalary tobynyń basshysy Erqanat Taıjanov Avstrııada jasyrynyp júrýi múmkin. Bul týraly búgin Astana qalalyq prokýratýrasynda ótken baspasóz máslıhatynda málim boldy.
«Qazirgi kezde sotqa deıingi tergeý amaldary júrip jatyr. Іs boıynsha aýdıt qarastyryldy. Taıjanovqa qatysty syrttaı qamaýǵa alý sharasy engizildi. Atap aıtqanda, oǵan halyqaralyq izdeý jarııalandy. Aldyn ala málimetter boıynsha, ıaǵnı kýágerlerdiń sózinshe, ol Avstrııadaǵy Vena qalasynda júr», - dedi Astana qalasy prokýratýrasy basqarmasynyń prokýrory Tımýr Kópbosynov. Budan buryn habarlanǵandaı, «Azbýka jılıa» qurylys kompanııalary tobynyń basshysy Erqanat Taıjanovqa qatysty qamaýǵa alý túrinde bultartpaý sharasy sanktsııalandy. Sondaı-aq oǵan izdeý jarııalandy. Sonymen qatar prokýratýra ókilderi búginde Qazaqstan men Avstrııa arasynda ekstradıtsııalaý týraly kelisim joq ekenin jetkizdi. Atap aıtqanda, osy is boıynsha tergeý amaldary aıaqtalmaǵan. Qazirgi kezde birinshi kezekte barsha úleskerler men keltirilgen shyǵyn kólemi naqtylanýda. Aıta keteıik, «Azbýka jılıa» qurylys kompanııalary tobynyń basshylarynan «Aısanam», «Aısanam de lıýks», «Komsomolskıı», «ExpoCity», «ExpoTown», «Komfort», «Garant», «Jeti Jol», «Sadovye kvartaly» jáne «Dınastııa» turǵyn úı keshenderiniń úleskerleri zardap shekti. Prokýratýra ókilderi qazirgi kezde jymqyrylǵan qarajat kólemi 27 mlrd. teńgege jýyqtaǵanyn aıtty. Alaıda aýdıt jáne sot saraptamalyq sharalarynan keıin naqty urlanǵan qarjy somasy anyqtalady.
