«Azbýka jılıa» kompanııasynyń qurylysy bitpegen nysandarynyń máseleleri sheshilýi múmkin
ASTANA. QazAqparat - Astana qalasy ákimdiginiń, prokýratýranyń birlesken áreketteriniń arqasynda «Azbýka jılıa» kompanııalar tobynyń 9 problemalyq nysany boıynsha ońaltý jospary ázirlendi. Qazirgi ýaqytta qurylys maýsymy bastalǵanǵa deıin túıtkildi máselelerdi sheshý boıynsha jan-jaqty jumys júrgizilýde. Bul týraly búgin jýrnalıstermen kezdesýde elordanyń Memlekettik sáýlet-qurylys basqarmasynyń ókilderi habarlady.
Baspasóz máslıhatyna turǵyn úı-qurylys kooperatıvteriniń tóraǵalary, «Azbýka jılıa» nysandarynyń úlesker-ınvestorlary, «ORDA Injınırıng» qurylys kompanııasynyń basshylyǵy qatysty, dep habarlaıdy qala ákimdiginiń saıty .
Eske salsaq, 2016 jyldyń 28 qarashasynda Astana qalalyq №2 Almaty sotynyń úkimimen burynǵy «Azbýka jılıa» kompanııalar tobynyń sottalǵan basshylaryna qatysty úkim shyǵaryldy jáne sottalǵandardyń qylmystyq jolmen tapqan múlki jábirlenýshilerdiń paıdasyna berildi. Ústimizdegi jyldyń aqpan aıynda elordalyq appelıatsııalyq alqanyń sheshimimen sottalǵandardyń múlki nysandardyń qurylysyn aıaqtaýǵa berildi. «Qazirgi ýaqytta «ORDA Injınırıng» basqarýshy kompanııasymen qurylys týraly qosymsha kelisimderge qol qoıdyq, búgingi kúni 2 myńnan asa kelisimge qol qoıyldy. Atap aıtqanda, jábirlenýshilerdiń tizimine enbegen jáne buǵan deıin kelisimderge qol qoımaǵan úleskerler endi óz quqyqtary men talaptaryn «ORDA Injnınırıng» kompanııasyna qoıatyn bolady», - dep habarlady «Jeti jol» TQK tóraıymy Bıbigúl Shapenova.
Problemalyq nysandardy ońaltý sheńberinde sottalǵandardyń múlikterin jáne aktıvterin satýdan túsken barlyq qarajat burynǵy «Azbýka jılıa» KT turǵyn úı keshenderiniń qurylysyna baǵyttalatyn bolady. Al úlesker-ınvestorlar qosymsha qarjy tólemeıdi. Búgingi kúni toǵyz problemalyq keshenniń ishinen eki turǵyn úı kesheni - «EKSPO taýn» jáne «EKSPO sıtı» - nysandaǵy bos aýdandar esebinen salynýda. Qalǵan jeti keshen «Orda Injınırıng» basqarýshy kompanııasymen kelisimderge qol qoıdy.
Búgingi kúni Sot aktilerin oryndaý jónindegi departament tárkilengen múlikke baǵalaý júrgizýde, onyń arasynda jyljymaly jáne jyljymaıtyn múlik, aýyl sharýashylyq tehnıkasy bar. Bul protsestiń barysy vedomstvoaralyq komıssııanyń erekshe baqylaýyna alynǵan. Qurylys júrgizýshilerdiń aıtýynsha, aldyn ala esep boıynsha, múlikti satýdan túsketin qarjy barlyq nysandardyń qurylysyn aıaqtaýǵa jetýge tıis, óıtkeni bos aýdandar da bar. Aldanyp qalǵan úleskerlerdiń jalpy sany 3,5 myńǵa jýyq. Árbir turǵyn úı kesheni boıynsha úlestik qurylys qatysýshylary qatarynan óziniń turǵyn úı-qurylys kooperatıvi quryldy, bul alǵa qoıylǵan mindetterdi móldir jáne transparentti túrde iske asyrýǵa múmkindik beredi, deıdi baspasóz máslıhatyn uıymdastyrýshylar.
Sondaı-aq, shara barysynda «ORDA Injınırıng» kompanııasy basshysynyń orynbasary nysandarda júrgizilgen jumystardyń barysy týraly tolyqqandy esep berip, qurylysty aıaqtaý shemasyn túsindirdi.
Eske salsaq, aldanǵan úleskerler satyp alǵan páterlerin tórt jyl boıy kútip keledi. Qazirgi ýaqytta burynǵy kompanııanyń eks-basshysy Erqanat Taıjanov Avstrııada, oǵan jáne aty shýly istiń ózge fıgýranttaryna qatysty qylmystyq ister qozǵaldy. 2015 jyldyń ekinshi jartysynda VAK usynysymen «Azbýka jılıa» KT burynǵy nysandarynyń bazasynda TQK-teri quryldy. Kooperatıvterdi qurýdaǵy jalǵyz maqsat jańa qurylys júrgizýshini, ınvestordy tartý jáne problemalyq nysandardyń qurylysyn aıaqtaý boldy. 2015 jyly «ORDA Injınırıng» JShS basqarýshy kompanııasymen kelissózder bastaldy, bul kompanııanyń astanadaǵy problemalyq nysandardyń qurylysyn aıaqtaý tájirıbesi bar. Nátıjesinde TQK jáne basqarýshy kompanııanyń arasynda kelisimderge qol qoıyldy.
