Azattyqtyń tańy men jańa dáýirdegi Qazaq eli: Baıbek Elbasynyń eńbegin tizip berdi
Qala turǵyndary men qonaqtaryn shýaqty merekemen quttyqtaǵan Almaty ákimi Naýryz meıramy dostyqty, ózara qurmet pen kelisimdi nyǵaıtýǵa baǵyttalǵan shynaıy jalpyhalyqtyq meıram ekenin atap ótti. Keńes zamanynda merekeleýge tyıym salynǵan Naýryz araǵa uzaq jyldar salyp, 1988 jyldyń kókteminde bir top ult zııalylarynyń uıytqy bolýymen Almatyda alǵash ret toılanǵan edi. Osylaısha uly merekemiz qaıta jańǵyryp, Qazaqstannyń Tuńǵysh Prezıdenti Nursultan Nazarbaevtyń 1991 jylǵy 15 naýryzdaǵy jarlyǵymen memlekettik sıpat aldy.
«Biz bıylǵy Naýryzdy erekshe jańalyqtarmen qarsy alyp otyrmyz. Kúni keshe, ıaǵnı 19 naýryzda Elbasy óziniń Prezıdenttik ókilettigin toqtatý týraly tarıhı sheshimin málimdedi. Osynaý qadamy arqyly Elbasy taǵy da eldik dástúrimizdiń ozyqtyǵyn kórsetti. Elbasy Nursultan Ábishuly Nazarbaev - Qazaq eliniń jańa dáýirdegi jasampaz tarıhynda ǵana emes, adamzat tarıhynda da úlken bedelge ıe sańlaq saıasatker, kemeńger tulǵa. Onyń esimi men eren eńbegi álem tarıhyndaǵy áıgili qaıratkerler - Túrkııanyń jańa tarıhyn jasaǵan Atatúrik, Amerıkanyń erkin el retinde damýyna negiz salǵan Djordj Vashıngton, saıasatkerligi men bitimgershilik qasıeti ańyzǵa aınalǵan Ýınston Cherchıll, Sıngapýr ǵajaıybynyń avtory Lı Kýan ıÝ ján basqa da tulǵalarmen qatar atalmaq», - dep atap ótti Baýyrjan Baıbek.
Qala basshysy óz sózinde Nursultan Nazarbaevtyń el ómirindegi tarıhı róli men irgeli isteri, halyqaralyq arenada keń qoldaý tapqan ıgi bastamalary oǵan jalpyhalyqtyq zor qurmet pen ólsheýsiz abyroı ákelgenin aıtty.
«Keńes odaǵy kúıregen óliara tusta el tutqasyn qolyna alyp, azattyǵymyzdy jarııalady. Elimizdiń shekarasyn shegendep, memlekettiligimizdi bekemdedi. Ata zańymyzdy, ulttyq rámizderimizdi bekitip, ulttyq valıýtamyzdy engizdi. Syrttaǵy qandastarymyzdy elge shaqyryp, Uly kóshke jol ashty. Qazaqstan halqy Assambleıasyn qura otyryp elimizdegi barsha ult pen ulysty bir shańyraqtyń astyna biriktirip, etnıkaaralyq kelisimniń qazaqstandyq modelin qalyptastyrdy», - dedi ol.
Sondaı-aq Baýyrjan Baıbek QR Tuńǵysh Prezıdenti qarapaıym qazaqstandyqtardyń ál-aýqatyn arttyrýdy qashanda memlekettik saıasattyń basty ózegi etkenin atap ótti. Táýelsizdiktiń eleń-alańynda «Bolashaq» halyqaralyq stıpendııasyn taǵaıyndap, elimizdiń myńdaǵan jastaryna álemniń eń ozyq ýnıversıtetterinde bilim alýyna jaǵdaı jasady. Al Qazaqstanda Nazarbaev Ýnıversıteti men Nazarbaev Zııatkerlik mektepterin ashty.
Elbasy Qazaqstannyń júregi bolyp tabylatyn tańǵajaıyp zamanaýı astana salyp, ony Batys pen Shyǵystyń arasyn jalǵaǵan, tórtkúl dúnıeniń saıasaty toǵysqan baǵanaly ordaǵa aınaldyrdy.
«Almatylyqtar Elbasyǵa orasan qurmet pen shynaıy súıispenshilikterin bildiredi. Osydan eki jyl buryn Táýelsizdik kúni qarsańynda almatylyqtardyń qoldaýymen Tuńǵysh Prezıdentimizdiń esimin ortalyq kóshelerdiń birine berý týraly máslıhat sheshimi qabyldandy. Fýrmanov kóshesi «Nursultan Nazarbaev dańǵyly» bolyp qaıta ataldy. Ótken jyly bul dańǵyl tolyqtaı jańǵyrtylyp, qala turǵyndary men qonaqtarǵa yńǵaıly da qolaıly etip abattandyryldy. Sonymen qatar, Jibek joly jáne Panfılov kósheleri, Abaı jáne Abylaı han dańǵyldary, ıaǵnı shaharymyzdyń tarıhı ortalyǵynyń 60% jańardy. Asqar Alataýdyń baýraıyndaǵy ásem alqapta ornalasqan Qazaqstannyń Tuńǵysh Prezıdenti saıabaǵy búginde qalamyz ben qala qonaqtarynyń eń jıi baratyn súıikti demalys orny. 2011 jyly osy saıabaqtyń tórine qoıylǵan Nursultan Nazarbaev eskertkishi shahardyń kórneki oryndarynyń biregeıi», - dedi qala ákimi.
Almaty ákimi óziniń sózinde sońǵy eki kún ishinde qalada atqarylǵan sharalar barysynda túrli ult ókilderiniń ózine jaqyn kelip, Elbasyǵa aıryqsha qurmet pen alǵystaryn bildirgenin aıtty. Baýyrjan Baıbek Elbasynyń salıqaly memlekettik saıasatynyń basty ózegi ortaq qundylyqtar, kelisim men turaqtylyq, baýyrmaldyq pen dostyǵy jarasqan birlik pen yntymaq ekenin erekshe atady.
«Bizdiń Tuńǵysh Prezıdentimiz shyn mánindegi Elbasy, Ult kósemi jáne Kóshbasshysy. «Almaty - Elbasy - Táýelsizdik» ajyramas uǵym. Elimizdiń táýelsiz tarıhynyń jarqyn betteri Almatyda ashylǵan. Nursultan Nazarbaev memlekettiligimizdi tuǵyrly, eldigimizdi ǵumyrly eter kóptegen asa mańyzdy qujattarǵa da osy Almatyda qol qoıǵan. Elbasynyń sózimen aıtqanda, «Almaty - Táýelsizdiktiń altyn besigi», - dep atap ótti ákim.
Qala turǵyndarynyń aldynda sóılegen sózinde Baýyrjan Baıbek Qazaqstannyń Tuńǵysh Prezıdentiniń Almaty qalasyn árdaıym erekshe nazarynda, turaqty qamqorlyǵynda ustaǵanyn atap ótti. N.Nazarbaevtyń qoldaýy arqasynda búgingi kúni qala el ekonomıkasynyń negizgi qozǵaýshy kúshine, ınvestıtsııalyq jáne týrıstik turǵydan asa tartymdy iskerlik ortalyǵyna aınaldy.
«Birde Elbasy «Almaty - týyp-ósken jerimiz. Almaty - mahabbat, Almaty - jastyq shaq. Men Almatyǵa qamqorlyq jasaýdy árqashanda ózimniń erekshe paryzym dep sanaımyn» degen edi. Almatylyqtar onyń úlken tebirenispen aıtylǵan osynaý júrekjardy sózderin únemi este saqtaıtyn bolady», - dep qorytyndylady sózin qala ákimi.
B.Baıbek Naýryz meıramyn qala turǵyndarymen birge merekeledi jáne Panfılov kóshesi boıymen júrip ótti. Tek búgingi merekeniń ózine ǵana 300 myńnan astam adam keldi, olardyń ishinde Japonııadan, Ońtústik Koreıadan, Malaızııadan, Belarýstan jáne basqa elderden 500-den astam týrıst keldi. Almatyda Naýryz meıramy bir aı boıyna toılanady jáne merekege oraı 80-nen astam shara ótetin bolady.
