Azat Іzbasarov BQO sotynyń tóraǵasy qyzmetine taǵaıyndaldy

ORAL. KAZINFORM – QR Prezıdentiniń 2025 jylǵy 13 naýryzdaǵy Jarlyǵyna sáıkes Azat Іzbasarov Batys Qazaqstan oblystyq sotynyń tóraǵasy bolyp taǵaıyndaldy. 

Búgin Joǵarǵy sottyń azamattyq ister jónindegi sot alqasynyń tóraǵasy Nurserik Sháripov Batys Qazaqstan oblysynyń sot korpýsyna jańa tóraǵany tanystyrdy. 

BQO sotynyń baspasóz qyzmetinen málim etkenindeı, is-sharaǵa óńir basshysy Narıman Tóreǵalıev, oblystyń quqyq qorǵaý jáne memlekettik organdarynyń birinshi basshylary, sýdıalar qatysty.

Nurserik Sháripov jańadan taǵaıyndalǵan tóraǵanyń sot tóreligin júzege asyrý sapasy men sot bedelin nyǵaıtý jolyndaǵy kóp jylǵy qajyrly eńbegin atap ótip, qyzmetine sáttilik tiledi.
Azat Ómirbekuly 1978 jyly Almaty oblysy Tekeli qalasynda dúnıege kelgen. 1999 jyly

Qazaq memlekettik zań ýnıversıtetin bitirgen. Jalpy eńbek ótili – 25 jyl.

1999-2004 jyldary – Taldyqorǵan qalasy ishki ister organdarynyń tergeýshisi.

2004-2007 jyldary – Almaty qalasynyń ishki ister organdarynda tergeýshi.

2007-2008 jyldary – Almaty qalasy ishki ister organdarynda tergeýshi, bólim bastyǵynyń orynbasary.

2008-2009 jyldary – Almaty qalasy ishki ister organdarynda tergeý basqarmasynyń bastyǵy.

2009-2014 jyldary – Qaskeleń qalasy Qarasaı aýdandyq sotynyń sýdıasy.

2014-2018 jyldary – Mańǵystaý oblysy qylmystyq ister jónindegi mamandandyrylǵan aýdanaralyq sotynyń tóraǵasy.

2018-2021 jyldary – Mańǵystaý oblystyq sotynyń sýdıasy.

2021 jyldan bastap qazirgi kezge deıin Batys Qazaqstan oblystyq sotynyń qylmystyq ister jónindegi sot alqasynyń tóraǵasy qyzmetin atqardy.

Eske sala keteıik, budan buryn SQO sotynyń tóraǵasy bolyp Serikjan Ǵabdýlın taǵaıyndalǵanyn jazǵan edik.