Azat Seıdalın jańa qyzmetke taǵaıyndaldy
ASTANA. KAZINFORM — Azat Seıdalın Búkilqazaqstandyq qoıan-qoltyq urys assotsıatsııasy tóraǵasynyń sportty damytý máseleleri jónindegi orynbasary bolyp taǵaıyndaldy.
2025 jylǵy 26 aqpanda general-maıor Sáken Isabekovtyń buıryǵymen Azat Seıdalın Búkilqazaqstandyq qoıan-qoltyq urys assotsıatsııasy tóraǵasynyń sportty damytý máseleleri jónindegi orynbasary bolyp taǵaıyndaldy.
Azat Álibekuly qaýipsizdikti qamtamasyz etý jáne Qazaqstandaǵy sportty damytý salasynda úlken tájirıbesi bar.
Ol elimizdegi dene shynyqtyrý men sporttyń damýyna qosqan úlesi úshin Qazaqstan Respýblıkasynyń Týrızm jáne sport mınıstrliginiń «Qurmetti sport qyzmetkeri» vedomstvolyq medalimen marapattalǵan.
- Azat Seıdalınniń qoıan-qoltyq urys assotsıatsııasy basshylyǵyna qosylýy – elimizde osy sport túrin damytý úshin mańyzdy qadam. Onyń bilimi, tájirıbesi jáne basqarýshylyq daǵdylary assotsıatsııa pozıtsııasyn nyǵaıtyp, sportshylardyń sapaly daıyndalýyna jáne áskerı-qoldanbaly sporttyń keńinen taralýyna yqpal etedi, - delingen habarlamada.
Aıta ketý kerek, Azat Seıdalın jańa qyzmetine qoıan-qoltyq urystan Qazaqstan Respýblıkasynyń chempıonaty qarsańynda kiristi. El birinshiligi 25-28 aqpan aralyǵynda Astana qalasyndaǵy «Abyroy» sport kesheninde ótip jatyr. Oǵan elimizdiń barlyq óńirinen 20 komanda quramynda 400-den astam sportshy qatysyp jatyr.
Buǵan deıin habarlanǵandaı Almaty oblysynyń sport basqarmasyna jańa basshy taǵaıyndalǵan edi.