Azat Perýashev jeke adamdardyń qarjylyq máselesine qatysty usynys aıtty
NUR-SULTAN. QazAqparat – Májilis depýtaty Azat Perýashev «Jeke tulǵalardyń bankrottyǵy týraly» zańdy qabyldaý qajet ekenin málim etti, dep habarlaıdy QazAqparat tilshisi.
«Sońǵy kezde qoǵam men Májilistegi bizdiń áriptester tarapynan nesıe raqymshylyǵyn júrgizý máselesi kóterilip keledi. Bul bastamaǵa pandemııa kezinde halyq tabysynyń tómendeýi men turalap qalǵan shaǵyn jáne orta bıznesti eskere otyryp, nazar aýdarý kerek», - dedi A. Perýashev Májilistiń jalpy otyrysynda jarııalaǵan depýtattyq saýalynda.
Osy oraıda ol nesıe raqymshylyǵan qatysty tabyssyz qalǵan adamdardyń talaby oryndy ekenin jetkizdi
«Degenmen bul talaptar azamattardyń únemi qaryz tuzaǵyna túsýiniń negizgi sebepterin sheshpeıdi. Osy sebepti sheshpeı, raqymshylyq týraly másele jyl saıyn qaıtalana beredi», - dedi depýtat.
Osy oraıda ol ótken jyly tabysy tómen adamdardyń bank qaryzdary 106 mlrd teńgege jabylǵanyn eske saldy. Alaıda qazirgi kezde problema ýshyǵa túsken, óıtkeni onyń sebepteri joıylmaǵan. Bul turǵyda eki sebep bar. Birinshiden, bankterdiń paıyzdyq talaptary negizsiz joǵary bolyp tur. Ekinshiden, jeke tulǵalardyń bankrottyǵy týraly zańnamany qabyldaý máselesi sheshilmegen. Bul qujat tólem qabileti tómen otbasylarǵa nesıeden qorǵalýǵa, baspanasy men áleýmettik kepildikti saqtaýǵa múmkindik berer edi.
A. Perýashevtiń paıymynsha, barlyq ıpotekalyq, tutynýshylyq nesıe men shaǵyn jáne orta bıznes úshin nesıe paıyzdarynyń shekti stavkalaryn tómendetý boıynga sharalardy qabyldaý kerek. Sonymen qatar, «Jeke tulǵalardyń bankrottyǵy týraly» zań jobasyn daıarlap, talqylaýǵa engizý qajet.
«Bul qadamdar jasalmasa, nesıe raqymshylyǵy týraly talaptar turaqty túrde jarııalanyp turady. Bul óz kezeginde qarjy júıesine nuqsan keltiredi», - dedi Azat Perýashev.
Eske sala keteıik, jaqynda Májilis depýtaty Aıqyn Qońyrov jeke tulǵalar úshin keń aýqymdy nesıe raqymshylyǵyn júrgizý qajettigin aıtqan edi.
