Azat Perýashev jasyryn olıgarhtarǵa raqymshylyq jasaýdy usyndy

ASTANA. KAZINFORM — Májilis depýtaty Azat Perýashev Premer-mınıstr Oljas Bektenovtiń atyna saýal joldap, offshorlyq aımaqtardan kapıtaldy qaıtarý úshin raqymshylyq jarııalaýdy usyndy.

— Halyqaralyq ekonomıkalyq daǵdarysqa baılanysty qarjy sarapshylary qory quraldary men AQSh dollaryna ınvestorlardyń senimi aıtarlyqtaı tómendegenin habarlaýda. Dál osy sebeppen offshorlyq aımaqtardaǵy jınaqtardyń da anaǵurlym qunsyzdanatynyn boljap otyr, — dep bastaǵan depýtat Prezıdent Qasym-Jomart Toqaevtyń Qaýipsizdik keńes otyrysynda aıtqan tapsyrmalaryn eske saldy.

Onyń aıtýynsha, qazirgi álemdegi ahýal Qazaqstan ekonomıkasyn offshordan azat etýge taptyrmaıtyn múmkindik usynyp otyr.

— Jeke tabys salyǵyn tóleý shartymen offshorlyq jáne basqa da sheteldik ıýrısdıktsııalardan qaıtarylatyn kapıtalǵa basqa jaýapkershilik júktemeı raqymshylyq jasaý máselesin qaraýdy usynamyz. Kelesi jyldan bastap jańa salyq mólsherlemeleriniń kúshine enýi de aktıvterdiń tezirek qaıtarý úshin mańyzdy qosymsha yntalandyrý bolýy múmkin. Mundaı qadam jasyryn olıgarhtarǵa geosaıası ahýaly shıelenisip turǵan jaǵdaıda offshorlyq shottardaǵy qarajattyń odan ári qunsyzdanýy kezinde yqtımal shyǵyndardy azaıtýǵa múmkindik beredi. Al ekonomıkaǵa qosymsha qarajat pen ınvestıtsııa ákelý múmkin. Offshorlyq aımaqtardan jáne basqa da sheteldik ıýrısdıktsııalardan kapıtaldy qaıtarý úshin raqymshylyq jarııalaý máselesin qarastyrýdy usynady, — dedi Azat Perýashev.

Eske salsaq, AQSh prezıdenti Donald Tramp ımport taýarlaryna 10%-dan 49%-ǵa deıingi jańa baj salyǵyn jarııalaǵannan keıin álemdik tehnologııa alpaýyttarynyń aktsııalary quldyraǵan bolatyn.