Azat Perýashev saýda ortalyqtaryna salyq jeńildikterin jasaýdy usyndy
ASTANA. KAZINFORM — Májilis depýtaty Azat Perýashev onlaın saýda damyp, saýda ortalyqtaryna kelýshiler sany azaıǵandyqtan, atalǵan ortalyqtardy qaıta qurý baǵdarlamalaryn daıyndaý jónindegi usynysyn málimdedi.
Onyń sózinshe, óńirlerdegi kásipkerlermen kezdesý barysynda saýda ortalyqtarynyń ıeleri men jalǵa alýshylar qazir halyq az keletindikten, taýarlardyń kóbi ótpeı turatynyn aıtady.
— Búginde saýda keshenderi shaǵyn jáne orta bıznestiń asa mańyzdy baǵyty bolsa da, jumysy toqyrap tur. Onda baratyn jurttyń qarasy sıregen, jalǵa alýshylar sany qysqarǵan. Saýda nysandarynyń ınvestıtsııalyq tartymdylyǵy quldyrap, kóptegen zal men dúńgirshek qańyrap tur. Al osy ortalyqtardy jáne ınfraqurylymdy salýǵa mıllıardtaǵan teńge ınvestıtsııa salynǵan edi. Mundaı ár obektiniń ar jaǵynda júzdegen jumys orny, salyq túsimderi, otandyq óndirýshiler men jetkizýshilerdiń qyzmeti tur, — dedi Azat Perýashev QR Saýda jáne ıntegratsııa mınıstri Arman Shaqqalıevke joldaǵan depýtattyq saýalynda.
Onyń aıtýynsha, oıyn-saýyq jáne saýda ortalyqtarynyń ıeleri men jalǵa alýshylary qarjylyq turaqtylyqty saqtaýy úshin atalǵan nysandardy jáne ondaǵy ınfraqurylymdy ózgertý qajet. Olarda balalardyń oıyn alańy, sport aımaqtary, attraktsıondar, fıtnes ortalyqtary, saýyqtyrý keshenderi, bilim berý mekemeleri, kompıýter klýbtary, fýdkorttar t. b. qyzmet túrleri bolǵany jón. Sonda atalǵan obektilerge degen buqaranyń qyzyǵýshylyǵy artady.
— Biraq mundaı jumystar, ıaǵnı saýda ǵımarattaryn keń aýqymda jóndeý, jańǵyrtý, qaıta qurý qosymsha ýaqyt pen qarjyny talap etedi. Sol sebepti, bıznes ókilderimen birlese otyryp, saýda ortalyqtarynyń qyzmetin qaıta qurý baǵdarlamasyn jasaqtaýǵa kirisýdi usynamyz. Nysandardy qaıta jasaqtaý, jańǵyrtý, qurylǵylardy aýystyrý jumystary úshin baǵdarlama qatysýshylaryna qoljetimdi nesıe berýdi jáne salyq demalystaryn qarastyrýdy usynamyz, — dedi depýtat.
Aıta keteıik, buǵan deıin depýtattar elektrondy saýda salyǵyn jeńildetýdi usynǵanyn jazǵanbyz.
