Azat Perýashev: Prezıdent qarjy sektoryn ońaltýda naqty tapsyrma berdi

ASTANA. QazAqparat - QR Parlamenti Májilisiniń depýtaty Azat Perýashev jeke tulǵalardyń bankrottyǵy týraly zańdy qabyldaýdy jedeldetý qajet dep esepteıdi. Bul týraly ol Demokratııalyq kúshterdiń «Qazaqstan-2050» jalpyulttyq koalıtsııasynyń Elbasy Joldaýyna arnalǵan kezekti otyrysynda málim etti, dep habarlaıdy QazAqparat tilshisi.

«Qarjylyq júıeni turaqtandyrý boıynsha Memleket basshysynyń tapsyrmasy asa mańyzdy. 2014 jyldan beri «Aqjol» partııasy jeke tulǵalardyń bankrottyǵy týraly zańdy ázirleý jáne qabyldaý týraly Úkimetke birneshe ret usynys tastaǵan edi», - deıdi Azat Perýashev.

Depýtat sátsizdikke urynǵan nesıeleýshilerdi bankrot dep moıyndap, olardan bar salmaqty alyp tastamaıynsha, bankterdi ońaltýdyń múmkin emestigin basa aıtty.

«Áńgime bir kezderi nesıe alyp, tóleı almaı, kóshede qalǵan azamattar jóninde bolyp otyr. Al Ulttyq bank únemi kerek, kerek emes, 3 jyldan keıin, 5 jyldan keıin dep jaýap beretin. Bul joly Prezıdent naqty tapsyrma berip, núktesin qoıyp otyr. Jeke tulǵalardyń bankrottyǵy týraly zańdy qabyldaý protsesin jedeldetý qajet», - dedi Azat Perýashev.

Sondaı-aq, májilismen Joldaýda bank sektorynan bólek, qor naryǵynyń damýy úshin brıtandyq zań negizinde jumys isteıtin Astana halyqaralyq qarjy ortalyǵynyń damýy jóninde de aıtylǵanyn erekshe atap ótti.

Aıta keteıik, Beıbitshilik jáne kelisim saraıynda ótken Demokratııalyq kúshterdiń «Qazaqstan-2050» jalpyulttyq koalıtsııasynyń kezekti otyrysy Memleket basshysynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýyna arnaldy. Jıynda eldegi jetekshi partııalardyń basshylary, Parlament depýtattary, Qazaqstan halqy Assambleıasy jáne birqatar qoǵamdyq uıymdardyń ókilderi jyldyń basty qujatyn talqylady.

Demokratııalyq kúshterdiń «Qazaqstan-2050» jalpyulttyq koalıtsııasy «Nur Otan» partııasynyń bastamasymen quryldy. Ol 5 saıası partııanyń, 17 iri qoǵamdyq birlestiktiń jáne 500-den astam úkimettik emes uıymdardyń basyn biriktiredi.